laraking áwot ning baryo
nagpasurabag daing gasto
pagparibod caiba su amigo
inarangat su asa tinampo.
timawang* mahilig maki-iwal
nakiigtokan sa sarung kinasal
yahuri ta daing nagpatol
sa angat, grabing baringhaw.
teenager na bantog sa kahambugan
pagkainurag sa mga ilinoman
atotot! pag ang motor pigapaharorot
otsenta sa curbada, preno sa acasia!
mag-amigo ga inuman sa tindahan,
primero: esturiahan, harâhâan;
maaban-aban, nag init su discusionan;
dangan, biglang nagtagâan.
ang arak bayâ, mayad na maraot:
pag tamâ ang karga, nakapa-ugma;
kung sumubra talagang nakarabya;
pag suminup-ay, barintok ang buhay!
atâ, pag dangog ngani amigo-
ining sasabihon ko dai ga salto
magpoon pa bayâ caidto….
daing toltol na bortok. bacong iyo?
——————————————–
*TIMAWA – bagra, barik