Dae ako nagsala, iguang naaksidente sa kahalabaan kan tinampo nin Lictin kan magselebrar ini nin kapiyestahan.
Tolo an gadan, kaibahan an duwang magksugnod na daeng helmet, nakainom y maparibod man sana sa kataning na barangay nin Timbaan.
Dae man cotana caipuhan mag-apura ta dae ngani ga sarong kilometro an distancia.
Alagad, pirming naringawan kan mga nakainom, an alak nakapahambog sa mga isip kan mga nakainom caini.
Gakusog an boses, nakakanta minsan sintunado, nakataram ning kung anong kahanginan sa ibang tawo y nakapakaskas nin buag sa motor, traysikel y awto.
Ta dae man puedeng ibawal an pag-inom nin agua de pataranta sa mga piyesta, cotana dagdagan kan cuerpo de policia sa Isla Maogma an presencia ninda sa tinampong harani o kataning kan barangay na gaselebrar nin piyesta.
Dae man puedeng asahan an mga tanod na iyo an magbantay ta an mga ini maigtok man.
Maski paradahan sana nin patrol car sa gilid nin tinampo sa banggui nin bisperas y maghapon nin kapiyestahan, puede na basta gailap-ilap an ilaw sa atop.
Abisuhan sana si kapitan na dae makaringaw na padarhan an mga nakatambay na pulis nin maluto, humba, paksiw, dinuguan, morcon, bistig y leche flan tanganing dae magutom sa maghapon.
An importante an mga hambogon na nakainom magamit nin helmet y maluway-luway pagparibod.
Sa paaguing ini, minsan dae talaga maiwasan an aksidente, mabawasan lamang an danyos, lalo na an mga nakadamay sana arog kan duwang nakamotor na binangga kan mga bortok na taga-Timbaan.
*****
Segun sa magcapirang principal, an cadaclan daang habo na magklase sa kainitan ka summer iyo an mga maestro y maestra.
Tibaad igua nang dating mga helang an mg aini na pigamati o daeng pambakal nin payong ta grabe an kautangan sa London, he! he! he!
Tutal ngaya, an cadaclan na mga classroom ngonian apat-apat an electric fan na pinakahang kan mga PTA kan mga nacaagui pang taon.
Dae man daa cotanang problema kung ipadagos an mga klase sa dating oras, lalo na sa mga barangay na bakong masyado namati an init lalo na itong nasa bulod, gilid nin dagat y salog.
An problema daa, caipuhan nindang magsunod sa kapagbootan kan DepEd Central Office na mag-implementar nin alternative modalities ngonian na summer.
An masakit caini, sabi ninda, dati nang nabawasan an class days por sobre ta i-adjust na naman an pagtapos nin school year.
Caya lugi na naman an mga estudyante y saendang mga magurang, minsan sa elementarya, hayskul o colegio.
Sa mga barangay sa bolod, an mga aqui na binuhian pakatapos kan 6-10 AM na klase, makarawat man sana sa tinampo ta mga sanay na sa init.
An mga nasa hayskul, mamasyar kung saen lalo na kung durodakula an balon.
Sa colegio, mas magastos ngani an online classes lalo sa an mga naka-boarding house. Atang mabakal ka na nin load para sa wifi, madagdag an bayadan ta caipuhan maggamit nin electric fan sa cuarto, bakong arog sa escuelahan na libre an hangin.
Aw ano nang gobyerno ini, dae lamang gahinguhang saboton an camogtacan sa gabos na provincia y municipio na bakong gabos grabe an efecto nin El Niño?
Aber, saen ka nakahiling ngonian na semana nin dugang na gabon o baratak na uma sa Isla Maogma?
*****
Bako man sana palan mga miembros nin BAC an batid maghocus-pocus sa mga documento.
Pati palan an magcapirang empleyado nakanuod naman nin madyik.
Tocaron na isyung ini sa masunod na semana…