Nag-ofrecir palan an manejamiento nin Campanya State University na makicooperar sa mga bagong SK chairman para sa saendang kanya-kanyang outreach program ngonian na Deciembre.
Segun sa informante, nagpasabot daa an gakapot kan programa na handa an Extension Services nin unibersidad na makipagtabangan sa mga SK sa anoman na programa ninda.
Puede daa magtao an CatSU o Campanya State University nin libreng facilidad arog nin aircon bus na may kubeta asin an mismong venue o lugar kan actividad.
An gustong sabihon sa mensahe kan Extension Services, magagamit nin libre an mga facilidad na ini kan Campanya State University, na iyo an magastos kan mga kinakaipuhan, lalo na krudo, bayad sa drayber, bayad sa sound system, pamirindal, pangodto asin bayad sa auditorium o gymnasium.
Alagad, sabi pa, mangyayari sana daa ini sa sarong kondisyon: dapat magdara an mga mapartisipar na SK nin tarpaulin o banner na may tatak na Padagos an Pakanos, ay sala, Patanos palan, movement ta iyo na daa ini an islogan ngonian kan Campanya State University, he! he! he!
Mayad na kaisipan ini y siguradong dakul an makagat na mga SK ta libre an gastos, CatSU an masagot, he! he! he!
Para ngaya mabitbit nin karatula kan soboot opisyal asin bag-ong islogan kan Campanya State University asin kung kinakaipuhan mairitaas nin toong kamot sa pagpalitrato kaiba an mga paratubod kan islogan…
*****
Nag-arabot daa kan nacaaguing semana an mga imbestigador kan DepEd Central Office para hilingon kung totoo man talaga an reclamo ni atorni Puting Buhok sa soboot mga iregularidad sa bidding kan mga proyecto, mga anomaliya sa pagpili asin appointment nin mga teacher, asin iba pa.
Inda kung ano an mangyari caini, lalo na ta sagcod sa ngonian pigabista pa man an kasong inihampang nin sarong contratista qui dating superintendente Collano asin an mga miembros nin BAC.
Tibaad lamang tunay na mga imbestigador an pinadara ni VP Sara, bako na mga kusinero sa canteen nin DepEd Central Office ta tibaad pareho an trabaho ninda sa mga miembros nin BAC, sabi kan atorning ubanon.
Mahapot-hapot kita sa mga marites sa dibisyon opis….
*****
Kadakul an gahapot kung ngata ausente an gatocaw na congresista sa pagvisita ni bise presidente Sara y senador Imee kan nacaaguing semana.
Dae daa ini naheling na magtagbo sa aeropuerto o caya nakisabay qui Gob Cua y Bise Gob Bos Te sa programa diyan sa Convention Center.
Maguiromdoman na pag-abot ni senador Tolentino dae pa sana naawat, nagtagbo ini sa airport asin nakipaagawan sa grupo kan gobernadora sa pagpasakay quio senador sa awto
Cotana daa aduman ini kan pagpalitrato kan grupo duman sa stage sa hampangan kan ginatos na tawo.
Dae man daa ini masayumahan kan Presidential Security Group (PSG) ta miembro nin Congreso, bakong arog sa sarong amo nin agencia na naheling na pilang beses dae pinasakat kan guardia ta dae kabali sa listahan, he! he! he!
Ngonian ka, segun sa impormanteng nasa Congreso, natakot daa an congresistang gatocaw na bawasan an fondo oras na mahiling ni Speaker Romualdez na kataning niya si VP Sara.
Mas matimbang na palan ngonian an fondo kaysa pagrespeto sa bisita, he! he! he!
*****
Kung topnotcher an Bato sa Isla Maogma sa barakalan nin voto kan nacaaguing eleksyon, daog daa kita kan mga taga-Albay.
Sinsilyo sana daa an tinaltag na quinientos cada votante kan sarong capitan o caya an treinta hanggan cuarenta mil pesos cada SK chairman.
Segun sa mga paramasid kan hiwas nin mga politico sa Albay, an cada lado daa guminastos nin sobrang quinientos milyones pesos sa pagmanok ninda sa saendang mga candidatong capitan.
An saro ngani daang alcalde, inatake sa puso kan maisihan na nadaog an saiyang candidato para capitan del baryo.