Lalong naging aktibo an mga parabomba nin sila sa Isla Maogma.
Nahihiling na naman sa saod asin sa gilig-gilid an pigatindang solid, na nadadakop sana gamit ang pampasabog.
Gustong sabihon, daeng kamhanan an kamas-kamas nin mga cuerpo de policia sa manlaen-laen na municipio sa gilid nin dagat.
Dati nang iguang osipon na an mga opisyal nacarecibe nin mga masiram na klaseng sila arog nin lapu-lapu, malasugui asin iba pang nakapabakal nin inumom, basta sana magpiyong sinda kung iguang maheling na mga illegal na parasira.
Haen na daw su dating mahigos na task force kaidto na iyo an nakadakop nin dakul na gamit pampasabog, compressor asin iba pang mga gamit bago pa man mag-pandemic?
*****
Sarong ciudadano an gahapot kung igua man nin parabomba sa mga municipio, lalo na pakatapos mag-agui an pambatag na bagyong si Paeng.
Segun sa osipon, tibaad daa iguang mga compressor an pitong municipio na gamit sa pagbilang nin mga nadanyosan ni Paeng.
Sabi kaya sa report kan capitolyo, treinta y unong mga harong an nadistroso y cuatro cientos treinta y ocho pa an nadanyosan kan hangin nin bagyo.
An nareparo kan chismosong ini, ngata daa ta an Virac, San Andres, San Miguel y Gigmoto daeng declaradong mga nagabang harong o caya naharian nin atop, lalo na an Virac asin San Andres na iyo an pinakaharani qui Paeng?
Duman sa Pandan, an pinakaharayo sa sentro ni Paeng, dos cientos cuarenta y sais an naapektuhan na harong asin sa Bagamanoc treinta.
Lo mismong an pinakamakusog na hangin ni Paeng sa Virac uminabot sana sa 65 kph, inano pa daw sa mga harayong lugar?
Tibaad daa binombahan man an datos gamit an compressor tanganing maghalangkaw an danyos y makadeclarar nin state of calamity.
Naguiromdoman kaya kan ciudadano na duman daa sa naenot na miting kan PDRRMC sa capitolyo, naunabihan an soboot pagsumitir kan Albay nin bloated an damage report sa bagyo kung ngata ini nakakua nin P600 million pakatapos kan Rolly mantang an Isla Maogma P120 million sana.
Ano daw daa kung arogon ta man an Albay y bombahan man an typhoon damage report tanganing makakua man kita nin durodaculang fondo?
Tutal ngaya, madari man sana sabihon na estimate man sana an isinumitir na datos y ini hari man sa mga barangay na dae pa nainspeksyon.
Sa ngonian, dae ta pa cierto kung talagang ginamitan nin compressor an datos o totoo man an pig-report kan mga municipio lalo na sa mga danyos.
Naguiromdoman ko lugod an nangyari kan magruso si Reming sa Bato asin Virac kan 2006.
Sarong banwaan sa Norte an nagsumitir nin damage report na gabos daang katawogan sa municipio afectado kan bagyo, mantang an nahiling na danyos ni Reming uminabot sana sa Paraiso diyan sa San Miguel.
Kung kan panahon, pasado na an DRRM Act or RA 10121, preso nin anom sagcod doseng taon an alcalde asin mga kakumplot na opisyal sa paggamit nin sala o binombahan na datos sa typhoon damage report.
*****
Dacul an nagreclamo kan pagserado kan Moonwalk Road dahil sa concert nin Orange & Lemons sa ARDCI Mall.
Harayo an pigributan kan mga motorista y pati an mga residentes harani sa venue naabara dahil sa nangyari.
Segun sa ley, puede sanang gibohon an temporary closure nin sarong tinampo kung iguang written order an local chief executive y puede sana ini kung iguang nangyayaring emergency, selebrasyon sa fiesta, rally, agro fair, o mga proyecto nin gobyerno.
Saro pa, dae puedeng sirahan nin temporary an arin man na tinampo kung an actividad bakong sponsored o aprobado nin local na gobyerno.
Dae man invuelto an LGU sa pa-concert nin ARDCI.
Dae man daang inisyung orden an gobernador para saradohan an Moonwalk, lalo na ta ini provincial road.
Mas lalong dae man puede magboot si alcalde Samuel y an capitan nin SIV.