Dae man mabasol an jefe kan cuerpo de policia sa Calolbon na ginibo niya ining isolation facility para sa saiyang agom asin aqui, segun sa mga osipon sa kahadean ni alcalde Nonong Mendoza.
Sabi kan mga nacaisi sa municipio, kinua daa an mag-ina hari duman sa sarong pribadong ospital sa Virac kung saen ini nag-positive.
Alagad, imbes na darahon sa quarantine facility kan municipio, duman pinadagos sa tolong escalon na istasyon na kataning sana kan municipio.
Kung nag-painano an mga kapulisan ni jefe kan maisihan ini, dae pang bareta. Tibaad duman man kinahang sa sarong cuarto o caya sa pinaka-itaas tanganing dae makaolakit.
Tibaad inibahan man duman ni jefe tanganing masigurong kataning niya an familia, siring sa ginibo nin babaye na nagpa-confine man sa ospital kan darhon duman an agom dahil sa COVID-19.
Puede man saboton an ginibo ni jefe, lalo na ta dae man iningma harong sa Isla Maogma, basta nakacolocar nin marinas y dae makaolakit sa saiyang mga tawohan.
Ngonian, iyo man ini halos an ginibo kan mga opisyal nin Campo Camacho kan iguang mag-positive na mga visita kan inagurasyon kan bagong edificio kan sarong taon.
Ta igua man sindang mga oficina y quarters sa laog kan campo, duman na sinda nagpaumay kan mga sintomas o caya sa paghalat kan resulta nin swab test.
Gasunod man sana an jefe sa ejemplong pinahiling kan saiyang mga amo, he! he! he!
*****
Saro sana palan an qualificadong candidato sa eleksyon nin director kan Dificelco duman sa Calolbon.
Caya tipid an nanggana na si dating capitan Alicia Arcilla, minsan siya sana an mangahang sa presinto para magvoto, pirming gana, he! he! he!
Dae caipuhan mangarkila nin tricycle y trak para manghakot nin votante y magpacaon.
Sayang na dae na nakabali sa eleksyon an mga iba pang gusto man cotanang makalaog sa junta directiva alagad dae qualificado ta kulang an naatenderan na asembliya kan nacaaguing limang taon.
Kung sabagay, puede na si director Arcilla qui GM Raul Zafe ta makasabot man daa ini kan mga teknikal na hororon sa Dificelco ta graduado nin civil engineering.
Sa Sabado, eleksyon naman sa Bato kung saen dae pa daang kalaban na nakua para qui Director Boy Vargas, an tahodan nang miembro kan junta directiva sa Marinawa.
Kung dae man sana daang maluwas na iguahanon o sisay man na kakapitalan nin maimo, gana na si Director Boy ta mas hararom an bolsa caini, he! he! he!
*****
Sa gabos sigurong mga nanumpang bag-ong mga lideres kan banwaan sa Isla Maogma, sinda Gob Boboy y Bos Te asin si alcalde Samuel an dacula an ginastos.
Ginatos an pinakaon kan mga ini duman sa mga nag-atender kan okasyon sa convention center sa capitolyo y duman sa Plaza Rizal.
Si PBM Obet nagpahanda man sa saiyang oficina pero mas masilam ta iguang buyod y kinis, pati maripot na cerveza, he! he! he!
An pinakamatipid iyo an mga elegidong opisyales nin Bato, ta duman sinda sa ARDCI sa Virac nagsumpa, kulang an mga tawsoy, he! he! he!
*****
Nagpoon na an junta provincial sa saendang trabaho sa liderato ni Bise Gob Bos Te.
Natural, mapoon na man an satong mga ginagalangan na mga elegidong opisyal, bako sana an mga consejal o bocal, kundi pati na an mga alcalde y gobernadora, sa paghanap nin mga mapakinabangan na mga proyecto, he! he! he!
Hihingibiton an presenteng badyet ta tibaad igua pang tadang kibit, makabawi-bawi lamang sa pinambakal nin voto kan nacaaguing eleksyon, he! he! he!
Hahalaton an 2023 budget ta duman an mga babarangaon na milyones, lalo na ta igua pang natadang contratistang PBM.
Alagad daog sinda kan congresista ta siya an magiging ikaduwang amo kan DPWH sa distrito.
Siya an enot na makabawi kan ginastos na sobrang cien milyones pesos, cabali na an soboot tinabag nin mga mahabas, he! he! he!