Ang pinakalugi sa pagbaba kan Alert Level sa Covid uya sa Isla Maogma iyo an mga politicong candidato sa maabot na eleksyon sa Mayo 2022.
Magpoon na maluwag na an paglamyerda sa banwa, padiit-diit na daang nasusod kan mga para-solocit an mga candidato.
Kun bakong mahagad nin pandagdag sa pambakal nin bolong, pambayad sa corriente o panghanda sa function, mangutang nin duro-dacula an mga dipung-alan na mga votante.
Ipanuga voto kan enterong familia, matawan sana, he! he! he!
Pero pag-abot kan eleksyon, ringaw an hinagadan nin tabang, pwe!
Iyo siguro ini an rason kun ngata an cadaclan na mga ambisyosong macatocaw o maelegir otro dae pa gabarasay-basay sa tinampo.
An naheling sana daa sa parteng norte, segun sa mga ciudadano, an dating alcalde kan Bato na si Leo Rodriguez, na pirang semana nang barik-barik tanganing atubangon an saiyang mga ward leader.
Pati si atorni Puting Buhok, na tuyong dae nag-aparecer kan pag-abot ni VP Leni, naolakitan na man. Nagribot na man daa an dating abogado kan DPWH regional office y naispatan nang nakinagbuan sa mga gustong darhon an saiyang candidatura sa Caramoran, Pandan, Bagamanoc, Panganiban y Viga.
Gaarapura an duwang ini tanganing matapos an saendang pagrecorida ngonian na semana, ta sa fecha 16, mapoon na an misa de Aguinaldo y lalong madacul an mga maki-krismas, he! he! he!
*****
Segun sa mga olay-olay kan mga nacaisi, dacula an posibilidad na an macaluwas sa 2022 iyo si Leni y Sara.
Ini daa kung an Comelec magdesisyon na nagbobowa si Bongbong sa saiyang CoC kan sabihon niyang nunca siya nasentensyahan sa anuman na kasong an penalidad perpetual disqualification sa anuman na posisyon sa gobyerno.
Maguiromdoman na magcapira nang petisyon an isinangat sa Comelec kan mga kalaban ni BBM base sa saiyang conviction sa tax case.
Kung balewalaon an saiyang CoC, si Leni an posibleng manggana contra qui Isko, Lacson, Bong Go asin iba pa.
Ang nakabinbin na mga disqualification case ni BBM iyo siguro an rason kung ngata dae pa nangahang sa Comelec an dakilang alalay ni Pay Digong minsan ini nagsabi na na siya maatras sa presidential derby.
Sa bise presidente, minsan dae na daa pagbilangon an voto kan boksingerong alcalde nin Davao ta cierto nang gana ini.
Halaton ta an mangyayari sa mga masunod na semana…
*****
Maabot daa si BBM sa Simba, fecha dose nin Deciembre.
Ini an huringhuding na nadangog ko sa banwa.
An hapot, sisay man daw na politico an matagbo sa aqui kan dating diktador?
Maguiromdoman na pag-abot ni VP Leni, an aduman sa aeropuerto iyo an naderotang congresista kan 2019, imbes na an gobernador na iyo an ama kan Isla Maogma.
Ni saro sa treinta y dos na candidato sa mga puestong pang-provincia miembro kan Partido Federal ng Pilipinas na iyo an gadara qui BBM.
Segun sa listahan kan Comelec, apat man sana an candidato kan PFP sa isla: sinda Wilbert Jimenez, Efren Tating, y Edwin Tolledo na candidato para consejal sa Gigmoto, asin si Domingo Tejerero kan Virac na gusto man maging consejal.
Posibleng sinda an mamejar sa papiktyur sa airport qui BBM.
Alagad kung kaiba ni BBM si alcalde Sara, medyo mapiot na an arrival area sa airport, ta puedeng mag-abot an mga kandidato kan Lakas-CMD: sinda Cong Hector Sanchez, PBM Edwin Tanael, PBM Santos Zafe, consejal Sonny Francisco y candidato para PBM ning Baras na si Dean Roberto Vergara, na anas mga taga-Lakas.
Iyo na ini an camogtacan kan guromok na politica bako sana sa Isla Maogma kundi sa enterong nasyon.
*****
Gurumod-gumod an ibang opisyal kan SLB kan pag-abot ni Leni sa Isla Maogma.
Dae na ngani daang gastos an naderotang congresista sa pagtagbo, nakisabay sana sa caravan, iyo pa an kataning ni VP y Obispo Manolo sa pagkaon sa Fiat.
Pero nangapital man daa si Saryo, ta naggastos man sa pagpintura nin pink sa kudal kan saiyang headquarters kan hapon bago mag-abot si Leni. Nahunat man na diit an bolsa kan alisto sa papelan, he! he!