Isip Isipon Ta qui Tang Tacio:

Damay sa politica ang proyecto ni Cong Hec

Invuelto ang isla sa karibokan kan mga tawo sa liderato kan PDP-Laban.

Sinipa paluwas ni party president Manny Pacquiao sinda Alfonso Cusi y Melvin Matibag sa sala daang gibo na makauyag sa partido.

Ngonian, guiromdomon tabi na si Cusi, an amo sa Department of Energy, y si Atty. Matibag, an presidente kan National Transmission Corporation, hari pa sana sa Isla Maogma kan Abril 30 para pirmahan an memorandum of agreement para sa submarine power cable na awat nang pinangako ni Cong. Hector bilang simbag sa kakulangan nin suplay nin corriente.

Sabi kan mga kino-kino sa ARDCI Corporate Inn kung saen ginibo an pirirmahan, igua pa daang nangyaring mga panuga pakatapos kan pormal na miting sa function hall.

Segun sa osipon, sinabi daa ni Cusi, na iyo an promotor kan planong pagkandidato ni Pay Digong bilang bise presidente sa 2022, na caipuhan magbali sa PDP-Laban an mga lokal na opisyales kan Isla Maogma tanganing mapondohan an submarine cable ni Cong Hec.

Kung nagsunod sa suhestiyon an congresista, gobernador y mga alcaldeng presente, dae ta maisihan sa ngonian.

Alagad, dae pa sana naawat, igua nang garibot na blangkong mga pirmahan para sa mga taga-islang gusto so boot na ipadagos an pagbabag-o na dara ni Pay Digong.

Posibleng katukal kan saendong rosnos sa blangkong papel an pagtao nin fondo nin Malacanang para sa proyecto ni Manoy Hec.

Tutal, harayo pa man an eleksyon, tuwangan ta na si Cong Hec na matawan nin perac an proyecto tanganing madagos an submarine power cable.

Basta pag-abot kan eleksyon sa Mayo 2022, iboto sana an toltol na presidenteā€¦

*****

Nagpoon nang maghiwas an mga poderosong grupo para sa lokal na eleksyon.

Segun sa mga chismoso, inimbitaran daa an mga alcalde nin Catanduanes kan nacaagui pang semana para sa sarong miting sa ibong.

Alagad, pag-abot sa Legazpi, dinara an siyam na alcalde nin Isla Maogma sa Misibis Resort, kung saen inabutan daa ninda an amo kan AKB partylist y si Mayor Posoy kan Virac.

Kung ano man an napaghoronan duman, iisihon ta pa.

Tibaad nangako man nin fondo an sarong daculang companya para sa panartag nin satong mga alcalde.

Tibaad igua man nin ibang hagad an congresista.

Nakalibre na nin estar sa macantidad na resort an sampulong alcalde, igua pa sigurong dinuhor an nag-sponsor na congresista, he! he! he!

Helinga niyo daw kung ginibong opisyal an travel kan mga tahodan na iniā€¦

*****

Ano daw ito si Cong Hec ta dae sana naawat sa isla kan nacaaguing semana?

Uminabot nin Hueves, Hulyo 1, ta madurar daa nin cabangang bulan an saenyang pagpaguiromdom sa mga votanteng Catandunganon na siya buhay pa. Alagad pagka-Lunes, nagsakay na sa eroplano pabarik sa Maynilang Kayganda.

Segun sa mga kahoron caini, igua daang mga importanteng kahoron sa negosyo caya pasensya ngona an saiyang mga constituentes.

Maabot man daa ngonian na semana para maipadagos an saiyang lamyerda asin paquitaratara sa mga ciudadanong naringwan na an saiyang pandok.

Magpaabot na tabi nin intensyon na magsingil an mga dae pa nakakobra qui Cong Hec tanganing matawan nin numero sa pila sa trangkahan nin mansiyon sa Bigaa.

*****

Igua pa man palan nin diit na ambisyon si dating alcalde Ding Guerrero na makabarik sa puesto sa Gigmoto.

Alagad, nadiskaril an saiyang planong kahoronon an siyam na capitan del baryo sa kahadean ni alcalde At-at.

Handa na daa cotana magpunta sa miting an ex-mayor, alagad bago pa man an oras kan saiyang pagviaje, pinapukawan daa ini ni Cong Bong tanganing magdiit-diit nin maripot na cerveza.

Resulta, dae daa nakahari sa oras an dating alcalde y kan makaabot sa miting, lampas nang duwa o tolong oras an nakaagui.

Kung igua pang natadang capitan, dae ta isi, pero sigurado kamo nakagolpi an mga ini kung nagdara si ex-mayor nin mga manangribong pangdupog sa mainit na payo, he! he! he!

Dae man daa nahagas si At-At ta sinako an pagdupog niyang dahon, he! he! he!

Leave a Reply

This site uses Akismet to reduce spam. Learn how your comment data is processed.

%d bloggers like this: