ISIP-ISIPON TA:

Nagtugpo naman si Cong Hec

Nagvisita man palan si Cong Hec sa isla, alagad bagui sanang langaw na nagtugpo sa caonon.

Dae daa nakalanding an eroplano kan Viernes caya nakaabot Sabadong odto na. Kaibahan an gobernador y sarong bocal, nanaltag sa Caramoran kan cuarta nin DOLE para sa mga trabahador kan TUPAD.

Kung noarin naman ini matugpo sa Isla Maogma, dae ta isi. Magbantay na sana siguro sa trangkahan kan mansion sa Valencia…

*****

Dae ta na isi kung ano na an nangyari duman sa ginibong imbestigasyon kan junta provincial sa soboot salang implementasyon kan feeding program diyan sa DepEd.

Natapos na daw panaltag nin pagcaon sa trese mil na mga estudyante sa elementarya asin hayskul sa laog nin veinte dias?

Pinainano daw an pagbakal asin pagdeliber nin rinibong ensaymada, siopao, Spanish bread, cheese bread, mansanas, pandesal na iguang palaman, monay, sandwich, banana cake, empanada, pan de coco, cupcake, mammon y cinnamon bread?

Saen daw na mga panaderia ini pinagibo, kung saro sanang masuerte an pinagibohan o kinua man sa mga panaderya sa onceng banwaan?

Nagtaraba man daw an mga kaakian pakatapos kan tolong semana? O an supplier sana asin mga taga-DepEd an guminabat an timbang?

Sabi ngani kan sarong chismoso diyan sa dibisyon, tibaad daa ginamit na an monay asin iba pang tinapay na pundasyon sa pagpaguibo nin harong. Kung kisay ining harong, dae man daw tinaram.

Dae man siguro nasolohan ta segun sa mga osipon, baranga-banga sana an mga nakinabang, maghababa ka man o maghalangkaw an tindog, he! he! he!

*****

An pagkapot nin poder nakapabag-o nin ugali nin tawo.

Caya ngani an cadaclan na toltol an pag-isip habo mag-entra sa politica ta tibaad kung manggana, dae pa ngani tapos an termino, dae mo na mamidbidan.

Cierto ining mangyayari ta gakampanya pa sana, caipuhan mo nang magbobowa, lalo na sa pagbakal nin voto.

Oras na macatocaw, raranihan na nin mga tentasyon sa calag, tanganing mabontog sa mga daendatang gibo.

An iba natentaran na magsimit sa kaban kan municipio y an iba carneng magayon an pigasimit, he! he! he!

Igua ngani daang alcalde ngonian na dae siguro nakaubay sa agom ta nadacop palan na igua man nin kaubay na iba na may agom pa, he! he! he!

Kung ano an nangyari pakadakop, dae ko na isi, kulang an detalye kan chismosong nag-osip.

Kung sisay man ining matinong na alcalde, halaton ta na sanang ibuaaw sa tribuna kan mga kalaban, he! he! he!

*****

Lalong gadacul an mga partylist na gustong makibanga sa voto kan mga taga-Isla Maogma.

Nagdecider na daa an Kusog Bicolandia na magbali sa partylist election sa 2022, natural an primerong nominee iyo an founder caini na si Noel de Luna y posibleng an panduwang nominee si Jorge Sarmiento.

An problema sana ta dati nang duwa an nagbanga kan cadaclan na voto sa partylist kan 2019, an Ako Bicol y an TGP ni Bong Teves.

An partylist nin parapabakal nin corriente nakakua nin veinte cuatro mil na voto mantang mas halangkaw nin diit an partylist kan dating bise gobernador na nakahakot nin veinte siete mil.

An BANAT ni Tiptio Wong nagpasensya sa halos cinco mil na voto.

Entonces, kung madawdaw man an Kusog ni SND, tibaad makua caini an voto kan BANAT.

Sa ngonian, medyo masakitan makaanab nin voto an Kusog ta nakapanuga na daa sa TGP an grupong Sa Dati Sana.

An luwas caini, mangampanya an grupo sa 2022 gamit an mga pandok ninda Sergio Osmeña o Manuel Roxas tanganing iguang tsansa na makaveinte mil lamang na voto.

*****

Nagsarong taon na palan na ausente sa sesyon kan consejo municipal nin Virac si Toy Gianan na dae na nag-aparecer ta tibaad daa maolakitan an arog sainyang mga goslab na.

Sa ngonian, mareclamo na daa an consejo sa junta provincial tanganing matapos na an problema.

Haen na daw si dating bocal Idoy tanganing kurakurahon an consejo sa isyung ini?

Leave a Reply

This site uses Akismet to reduce spam. Learn how your comment data is processed.

%d bloggers like this: