Noarin daw mapoon an milk feeding program kan DepEd sa Islang Maogma?
Segun sa kino-kino sa DepEd, igua na daang daculang trak na nag-abot kan nacaaguing semana para magdiscarga nin ginatos na kahon nin Alaska evaporada sa dating kahadean ni Despi.
Sabi pa, maabot daa sa catorce milyones pesos an contrata sa pagsuplay kan commercial milk product sa dibisyon, na nakua kan sarong masuerteng supplier na dati nang harani sa kusina kan dibisyon.
An cada sarong estudyante sa Grade I to VI na mga “wasted and severely wasted malnourished children” macarecibe yata nin tigsarong kahon na gatas pati na mga masustansyang pagkaon sa irarom kan programa kan gobyerno nasyonal. An mga gatas y pagkaon iyo an babahogon sa laog nin veinteng aldaw sa mga maniwang asin ogpok na mga aking napabayaan nin magurang.
Sa ibong, an itinao yatang gatas natural na hari sa karabaw o baka mantang an mga taga-isla mga delatang evaporada an itao. Dae yatang nakapasusong karbaw sa isla ta dae pa ngani nakaogbon, ipabakal na sa mga parabono, he! he! he!
Magayon na programa ini, lalo na kung masusteniran kan gobyerno. An Catanduanes saro sa provincia sa Bicol na iguang malalang problema sa malnutrisyon, lalo na sa Caramoran.
Igua man cotanang mga bakanteng lote na puedeng pagtanoman nin mga gulayon asin mga daeng gibo sa barangay na puedeng taohan nin asistencia nin mga municipio sa paagui nin seeds y fertilizer, alagad an fondo cadaclan nakatagama sa mga proyectong semento, bato y bakal.
Caya an gataba bako man an mga pobreng taga-baryo kundi an mga contratista y politicong nakatukaw, pwe!
*****
Iguang reclamador na gapaabot sa municipio nin Virac na aksyonan man lamang an mga trak y iba pang vehiculo na nakaparada sa mga gilid na kalsada na sobra nang sarong semana.
Puede pa daang masabotan kung an mga vehiculo mga pribadong sasakyan na traysikel, kotse o SUV na sa tampad man sana kan cadsadili nakapark lako na kung banggui. Kabali man dindi an mga auto repair shop na gamit na an tinampo sa paghingayad kan mga sasakyan.
An problema daa ta an mga nasa long-term parking mga daraculang trak na kargahan nin mga efectos para sa tindahan, lalo na diyan sa iguang Rawis y Francia. Segun sa reclamador, sala man na iparada an mga ini sa tampad kan mga residencia na bako mag pagsadiri kan negociante ta ata nang nacaolang, puede pa magin causa nin aksidente.
Inaapodan an mga nanunungdan sa kahadean ni Posoy na pakihoronan an mga alipores kan negociante ta tibaad marabya an mga naperhuwisyo, magreclamo pa sa DILG…
*****
Segun sa osipon, maabot na sa walong milyonaryo an tinamaan na nin COVID-19 sa isla.
Dae pa dindi cabali an mga dae nagpa-swab, dae nag-report sa BHERT o RHU, asin an mga pinadulag sa Maynilang kayganda ta igua sindang ikabayad sa mas marinas na pagpabulong sa St. Luke’s Global City asin iba pang hotel na ospital.
Kung bako sanang mga mayaman o poderoso an mga ini, lampas na sigurong dos cientos an na-COVID sa Isla Maogma, lalo na kung madari sana an pag-testing sa mga suspetsadong iguang coronavirus.
Dae man nin halaga an mga rapid test, masque pa an antigen, ta ini ngani daa si Bise Mayor Arlynn na na-expose sa pasyenteng iguang COVID, duwang vez pig-antigen test alagad parehong negative an resulta. Bago siya nag-positibo sa PCR swab test, tinugotan na siya kan doctor sa RHU na mag-atender nin sesyon y sarong pamiting ni alcalde Posoy sa saiyang mga department heads.
Caya dae cotana dagos mag-insistir an mga doctor sa ospital na COVID an helang kan mga pasyenteng galaog sa ER, lalo na kung clarado man na hayblad o atake de Corazon an helang caini.
Magcapira nang mga natigbak sa ospital an pinalubong dagos minsan bako man COVID an helang. Dae lamang kinunsiderar an sentimiento kan familiang nagadanan na gusto man paglamayan pa an saendang mahal sa buhay nin masque tolong aldaw.
Segun sa osipon, sa laog sana kan nacaaguing duwang bulan, apat na an piglubong sa laod nin dose oras pagkatigbak ta an sabi kan mga doctor, COVID daa. An nakarabya sa mga nagadagan, negative sa PCR swab test an mga ini, matapos na magpositive sa rapid test.
An hapot, kung mga alisto man an mga doctor sa pagheling kan helang nin saendang mga pasyente, ngata na negative an resulta sa RT-PCR test? Bako daw na gabakasakali an manejamiento na magin positibo an resulta tanganing makakua nin duro-daculang benepisyo sa PhilHealth?
Gahapot sana tabi….