Binarangabanga na an balyena?

qui Tang Tacio

Natapos na man an palabas sa capitolyo. Dae na daa nag-aparecer si Gob Boboy sa saiyang oficina, limang aldaw matapos pagpa-asumiron kan saiyang abogado. Sa barangay na sana daa maoficina an suspendidong gobernador ta daeng masuhay saiya y siya pa an dudulukon nin mga katawohan.

Segun sa sarong pilyong chismoso, marinas man daa cotana an ginibo ni Boboy, tanganing magin duwa an gobernador. Dati na daang duwa an congressman, kaya lalong maasenso an Islang Maogma ta duwa na an gobernador, he! he! he!

Sabi man kan iba, nag-asumir na daa si Boboy ta bagui daang mahubas na an burabod kan mga contrata sa capitolyo, he! he! he!

Binarangabanga na daa kan duwang acting na opisyal pati an mga honorableng bocal sa junta provincial, he! he! he!

An gustong sabihon, masque pa daa matapos an suspensiyon ni Gob Boboy sa Abril 30, an aabutan niya daang balyena tonok na sana an tada, he! he! he!

Natural na ini sa buhay politica. Kung dae an leon, natural na an mga tigre iyo an mahade sa kabukidan.

Alagad bako man daa ini an tunay na rason kung ngata bigla na nagdesisyon an gobernador na halaton an katapusan kan saiyang suspensiyon.

Ta nagtukal siya nin abogado sa kaso sa Ombudsman, iba man an magiging pagheling kan saiyang bag-ong abogado sa kaso.

Nagtubod man sana an gobernador sa abiso kan atorni kaya nangyari ini. Isi man siguro kan saiyang grupo na dae man mauswag an siring na pag-asumir ta caipuhan an pormal na orden kan DILG tanganing an suspendidong local na opisyal makabalik sa puesto.

Masakit na kalaban an gobyerno, lalo na kung ini kapot kan saimong mga kalaban sa politica. Dae kang ganahan, masque ano pang patuwad-tuwad an gibohon mo.

*****

An hapot sana kan mga usisero, kung magiging mapait an Tamang Timpla ninda Cua, Sanchez y Abundo.

Dae man siguro mangyayari, lalo na kung adyan pa man guiraray an pagrespeto kan bise gobernador sa saiyang naging running mate kan eleksyon.

Bako man sigurong lugi an gobernador sa mga proyecto sa provincial, ta adyan man an si Cong Hector Sanchez na binilyon an darang proyecto sa isla. Imposible man na dae maghiras an congressman sa saiyang gobernador.

An importanteng pag-isipon, sa panahon na ini sagcod na mag-eleksyon sa 2022, an sisay man na madalagan sa halangkaw na posisyon sa isla caipuhan an suporta ni Boboy Cua.

*****

Nagselebrar nan in kapiyestahan ni Hesus Nazareno kan fecha nueva, y nagsarayaw naman para sa Sinulog version kan Virac sa kapiyestahan ni Santo Niño kan nacaaguing Sabado.

An nareparo kan mga nagparada bitbit an mga imahe kan Omboy na Hesus kun ngata adyan pa natindog sa Plaza Rizal an higanteng Christmas tree kan municipio.

Lampas na daa an Krismas y maabot na ngani an kaaldawan nin mga puso, mga gaharyawan, magsiyota, mag-agom y mga sambayero, adyan pa an simbolo ni Santa Claus.

Segun sa mga chismosong daeng gibo sa buhay, tibaad daa nanghihinayang an municipio sa ginastos na labing cien mil sa disenyo kan Krismas tree na an poste y mga kable ikinabit kan Dificelco. Tibaad daa gustong mabawian pa man an ginastos dindi, he! he! he!

Simple man sana cotana an solusyon: dae na pagharion an Krismas tree hanggan Deciembreng masunod.

Tanganing kulang an gastos, magpagiribo na sa ginatos na casual sa municipio nin tigsarong puso na haman sa botong o plastic y iyo ini an idecorar sa Krismas tree para sa Pebrero 14.

Pag-abot kan Semana Sana, patoson naman nin ginatos man na itom na krus.

Pagselebrar kan Burac Festival, mga burac naman na plastic an ikahang sa kahoy.

Pag-abot kan Abaca Festival, masque iyo na ito, takupan sana an mga bitoon.

Harimbawang dae matumba nin bagyo y abutan pa nin Noviembre uno, mga letrang “RIP” an idecorar, dagdagan pa nin mga marmol na lapida, lalo na itong dae na nagawad sa talyer, he! he! he!

Leave a Reply

This site uses Akismet to reduce spam. Learn how your comment data is processed.

%d bloggers like this: