Sagcod sa ngonian, daeng osipon an cuerpo de policia nin Virac sa mga dagdag na detalye kan soboot kagawad nin barangay na nadacop na gapataya nin two-balls.
Dae man nginaranan an suspetsado o taga-sain para masusod kan mga paraberta sa radyo o peryodiko.
Ano daw an pigatago? Ang ngaran kan tawo o grupo na capitalista kan ilegal na pasugal? Harani sa nanunungdan an mga mastermind? Masakit dakupon dahil dindi?
*****
Balewala sa cadaclan na opisyal nin gobyerno local an orden kan DILG na harion an mga pa-epal na marka sa mga pampublicong mga proyecto o imprastraktura sa Isla Maogma.
Diyan sa pinahalabang boulevard of broken dreams, sa may parola sa Sta. Cruz, pinintura an mga slogan y pangaran nin mga politicong hade-hade sa isla.
Adyan ang sa TGP, ang Catandunganon Alisto y Padagos na Patanos. Sa tatak kan edificio sa rikod kan Capitolyo, aduman an drowing kan kamot ni Patanos. Sa panartag o mga pagvisita ni Cong Yoloyo, aduman ang alistong tatak pati an pandok niya.
Noarin man daw rereparohon kan DILG o sisay man na pangahason na ciudadano an mga opisyal na ining buta na, bongog pa?
*****
Igua na sanang diez y nueve dias an junta provincial para aprobaran an 2026 budget kan administrasyon ni Gob Patrick Azanza.
Inda kung igua lamang nahaman kan Lunes sa primerong sesyon pakatapos kan tiripon nin mga PBM sa Maynilang kayganda.
Caipuhan siguro maghororon na naman an duwang lado kung pano mapadari an proseso tanganing duro-diretso na, tutal nagbarangaan na man daa, he! he! he!
Kung sa oma, tinanom na an pisog, binaribhi na ngani caya igua nang gatubo na diit.
Dae man puedeng lamoson na nin tubig o dagdagan an pataba, ta baad magluyos y magadan.
Luway-luway sana y diit-diit ta baad maghikay an tinanom, he! he! he!
*****
Apat na aldaw na sana an trabaho sa gobyerno magpoon ngonian na semana, kapagbootan nin Malacanang para makatipid sa kunsomo nin kuryente y gasolina.
Caya an mga ciudadano na iguang transaksyon sa mga oficina, guiromdomon na an oras nin servicio civil mapoon alas siete matapos alas seis nin hapon.
Kung sa mga oras na an wara an hanap ninyo, ireklamo dagos sa amo o caya sa 8888.
Dae man afectado an clase y an mga nasa importanteng trabaho arog kan pulis, bumbero y iba pang mga caipuhan sa panahon nin emergencia.
Dae man nin maguinibo an publico kundi tioson an sakit na dara nin giyera sa Middle East – halangkaw na presyo nin krudo, gasolina, kerosene na maresulta man sa halangkaw na presyo nin barakalon asin kuryente.
Urawang gauran-uran pa, mamakal na nin mga tanomon na pisog sa tindahan ni Joza diyan sa saod asin magtanom sa solar o caya sa lata o paso.
Kung aboton na nin cuatro cientos an presyo nin sila y quinientos an kilo nin carne, puedeng igisa an sardinas sa petsay na madari anihon, sarong bulan sana.
Ano daw kung igua lamang nin dagdag na ayuda an gobyerno para sa mga kulang an ganancia?
*****
Mayad pa ang mga politicong nakatucaw y an saendang mga agom, kabit o sulsultant.
Maski bawasan nin sesyon o laog sa oficina, pirming paldo. Daog pa nin deligencia an tunay na sueldo. Kung hanapan nin tabang, cadaclan na butbot bako man sa sadiring bulsa kundi sa kaban nin gobyerno.
Kung paagihan man nin programang tabang nin gobyerno nasyonal, mapapogi pa sa magtaltag na pakahona mo saiya an cuarta.
Hapot ngani ni Atorni Puting Buhok, noarin daw mabawas an mga tontonfg votante sa Isla Maogma?