Mamundag na lamang ang omboy sa sabsaban, dae pang kamhanan ang orolay kan junta provincial y an gobernador manongod sa Quarta Relief Fund.
Kan nacaaguing semana, hinagad ni Gob Pata na mag-olay sinda ni Bise Gob Obet sa hampangan ni obispo, na soboot iyo an spiritual adviser kan gobernador. Inda kung iibahon man ni bise an saiyang spiritual adviser, he! he! he!
An gusto daang mangyari ni Azanza, magpirma nin waiver an bise gobernador y mga bocal na nagvoto sa QRF na ipanaltag na cash.
An katuyuhan caini iyo na tanganing daeng sala an provincia sa pagsunod sa ordinansa.
Parehong sala, ta dae man daa maaser an waiver, sabi nin gurang nang abogado de campanilla.
An pagheling kan cadaclan, lalo na an mga gahalat kan atrasadong ayuda, iyo na dae magkakaoyon an duwang lado lalo na ta parehong mga matagas an payo, mga tabilan pa sa social media.
Ngonian logod, nadamay na an pag-aprobar kan 2026 budget.
An duwang PBM na dating kaalyado y gusto nganing harion sa puesto sa comitiva nin appropriations y infrastructure, iyo an nangengenotan para kuwestyunon an fondo sa proponidong budget na soboot ipambakal nin mga bus na gagamiton kapareho kan Pasada Eskwela kan nacaaguing administrasyon.
Uminabot na pati sa puntong inapod na daang bubuwaon an gobernadora nin PBM na kaduelo niya sa Facebook.
Saro man daang PBM an nagpatakot nin violencia laban sa saiya man sanang kaibahan sa SP. Kung ano an dahelan, an mga goslab na sa junta provincial an nacaisi.
Ano na ining nangyayari sa cadaclan kan satong mga elegidong opisyal sa capitolyo?
*****
Igua palan nin mga ciudadano sa Viga na ganahap kan soboot tinaong spaghetti nin sarong senador y mga bag na dinonar man nin sarong congresista.
Sabi kang dae nagpamidbid na residente nin banwa, isi daa ninda na adyan da municipio an mga hinubon kan duwang politico alagad dae ninda naisihan kung ngata dae pa nadistribuer sagcod sa ngonian.
Magayon caini hapoton nindo an consejo municipal tanganing ciertong maisihan kung ano an plano kan LGU, kung ipanaltag an pang noche buena o hahalaton pa an masunod na bagyo sa 2026.
*****
Inaward palan daa kan BAC nin Viga LGU an pagpublicar nin sarong importanteng ordinansa sa sarong dyaryong awat nang dae naheling sa Isla Maogma.
Ginana daa kan Dyaryo Reporma an bidding o canvass kan pagpublicar kan ordinansa sa fish landing center kan municipio, na kaipuhan tanganing maisihan kan banwaan an mga babayadan kan magamit sa pasilidad.
An problema, bihira magluwas an nasabing dyaryo, gabutwa sana paminsan-minsan, ni dae ngani ini puwedeng magpublicar nin mga legal notice na caipuhan an accreditation kan local na corte.
Cotana, magluway-luway an BAC y mga mapirmang opisyal sa mga papeles ta tibaad mapasala sa ginibo ninda.
Sa ngonian, maski magbirilangan pa, an Tribune sana an nakamantener nin kopyang lampas sa tinalaan kan RTC y nakalakop sa enterong Isla Maogma sa laog nin nacaaguing cuarenta y cuatrong taon.
*****
Inaabisuhan na an gabos na mga maribot sa mga harong-harong y makipila sa kung sisay na politco, magbitbit nin kapote o payong tanganing dae maghelang kung mauranan.
Dae na magbitbit o magguyod nin mga saday na aqui, ta sayang an ibayad niyo sa bolong y padoktor kung maghelang an mga ini.
Por sobre ta bihira na magribot an Santa Claus, kamo na an garibot sa ngonian.
Sa Mayo 2028, maribot man an cadacul na Santa Claus. Sinda an tunay na pigahalat kan mga nakurangan kung Krismas.