Maria, Virgen Inmaculada
modelo ning pagtubod –
bulanos mong inako sa puso
ang dai nasabutan ning payo.
dahil sa saimong “fiat”
namundag sa sinapupunan mo
ang “Salvador del mundo” –
kaya nagsilang sa belen
ang bitoon ning kaagahon
na nagpariwanag sa kinaban
sa tahaw ning kadurman;
dangan, nagtalubo sa Nazareth
ang familiang modelo
na nakasandig sa langit.
duman sa cana ning galilea
nagsabi ka sa mga surugoon,
“giboha ang ano man na isabi Nya…”
kaya su tubig naging arak;
su matabang naging mahamis
tanganing maging maogma
ang buhay ning tawo sa daga.
su pagsakit kang aki ning tawo
sa palasyo ni pilato –
imbes na marunot ang puso mo –
lalong nagpatibay kang pagtubod mo.
ata, maski sa tuktok ning kalbaryo
inako mo ang cruz ni Kristo
na iyo ang kapangganahan ning tawo!
Maria, Virgen inmaculada
Ina ni Jesucristong Dios,
Ampona man tabi kami ngonian
Sagcod pa man…. AMEN!