Habang dae pa natatapos an patrabaho kan Hi-Tone Construction diyan sa flood control project sa Gogon Sirangan sa Virac, magayon siguro na hagadon kan municipiop an mga orihinal na plano asin program of work sa DPWH regional office.
Kung manayuma an alcalde, puede man na an consejo sa pangengenotan ni bise alcalde Kalem Surtida an maghagad.
An katuyohan caini iyo na maisihan kung ano talaga an inaprobaran na istruktura diyan sa barangay, malang dati nang iguang dike an mag-ibong na pangpang kan salog na pinondohan nin suma total na P57 million kan 2018 y 2019.
Dae man kita gahagad na mag-imbestigar man an consejo kan mga flood control project sa Virac Kundi sigurohon sana na toltol an patrabaho, lalo na ta pabaya an regional office sa mga proyecto caini sa hararayong lugar arog kan Isla Maogma.
Kung habo man ninda imbestigaran, itao na sana sa mga ingeniero tanganing makapariwanag sa mga constituentes nin Gogon Sirangan.
Makatuwang in isa pagsimbag nin magkapirang kahapotan.
Enot, ngata ta kinanghan pa nin fondong noventa y tres milyones para sa lugar na dati nang iguang dike?
Icaduwa, kung talagang mga taga-DPWH an nagpreparar kan plano, ngata ta dae ninda isi na dai nang iguang dike, lalo na ta an disenyo soboot kan P93 million na proyecto para sa bag-ong dike?
Icatolo, inano kalahaba an bakal na sheet piles na ipalubong diyan sa gilid kan dati nang dike?
Caipuhan ining maisihan kung tolo o anom na metro an laba kan sheet pile ta tibaad tolo an ilubong alagad anom na metro an nakakahang sa plano. Isip-isipon kan banwaan na an cada sheet pile labing cuarenta mil pesos.
Ngonian pa sana ngani, sabi kan mga taga-saod, banggui kung gatrabaho an mga equipaje kan Hi-Tone. Entonces, daeng bantay ta mga nanok an mga tawo. Gakutkot pa sana an, inano na daw kung gapalo nan in sheet pile?
*****
Dae pa ngani natapos an 100 days kan mga bag-ong tukaw na mga amo, igua nang mga nagrebentang kaalyado.
Diyan palan sa junta provincial, parehong nagsayuma si PBM Bani y PBM Turado na suportaran an appointment kan abogadong daeng buhok bilang bag-ong prinsipe sa capitolyo, he! he! he!
Apat daang mga soboot eksperto an sakop kan hinahagad na aprobaran kan SP an mga appointment.
Afuera daa sa daeng buhok na magiging Attorney IV, duwang retirado sa gobyerno na halangkaw man an katungdan y saro pang dating OFW.
Dae daang problema an tolong ini, minsan dae man nin buhok an saro sa saenda, he! he! he!
Sabi ngani kan mga nacaisi, qualificado man an atorni sa posisyon ta bako man siyang prohibido na maglaog sa gobyerno minsan siya naging nominee sa partylist kan nacaaguing eleksyon.
An habo sana daa kan duwang matanos na dae nadagos iyo na dae sindang trust and confidence sa magiging Attorney IV.
Saro pa daa, dae nasabotan kung ano talaga an papel caini, kung abogado, quarry operator o legal adviser sa illegal na sugal, he! he! he!
*****
Posibleng an mga caribocan na ini conectado talaga sa quarry.
Segun sa mga chismosong dacula an tindos, igua na palan daang pignombraran na mga quarry operator sa mga banwaan.
An pinakadacula daa nasa San Miguel, y igua naman nin binasbasan na duwang matanos sa Pandan y Caramoran. Inda kung sisay pa an mga bebenditahan sa walo pang banwaan.
An gabos daang contratista sa Isla Maogma puede sana magkua duman sa mga binasbasan na mga quarry permittee.
An bayad sa cada cubico nueve cientos pesos kumpara sa dating cuatro cientos pesos bago mag-eleksyon.
Durodacula an tongpats sa graba y baybay, tiba-tiba an makinabang, he! he! he!
An cadaclan daa na permittee, an gusto kan mga amo sa capitolyo sinda na an mapadalagan y tatawan na sana an permittee nin cincuenta pesos cada cubico habang gatukaw-tukaw.
Masakit pa naman daang magsayuma ta iguang kaibang mga escort na padara nin Campo Camacho, he! he! he!
Igua na palan nin bag-ong monopolyo, pero sa graba asin baybay, he! he! he!