Nagkil-ad an gobernador kang sabihon nin taga-DPWH regional office na an pagpatonong kan quarry operations an dahelan kung ngata bagolbolon y atrasado an patrabaho nin subcontractor, ay sala, contractor palan, sa patinampo diyan sa tampad nin CatSU.
Sobra na daang sambulan na tinugotan na magpadagos an mga parakutkot nin baybay asin graba, segun qui Gob Patrick y dae ini puedeng gibohon na rason kan contratista, ay sala, subcontractor, sa saiyang palpak na patrabaho.
Kadakul man daang tinawan na nin permiso na magkaykay sa mga salog y sapa nin kaipuhan na materyales sa construction.
Alagad iguang mga osipon na an saro daang supplier nin graba y baybay sa contractor ning DPWH kabali sa listahan kan mga dae pang permiso magpaluwas nin panghalo sa semento.
Ngonian, kung igua man nin makuahan nin graba o baybay an subcontractor na taga-Central Luzon, posibleng totoo talaga an huringhuding na dae ining pambakal, caya an nahaman sana sa proyecto magtomok kan baldosa y magkutkot para sana bayaan nin pirang semana.
Labi na daang quince milyones pesos an utang kaini sa kinuang semento sa duwang daculang hardware pa sana sa Virac.
Pinakati sana talaga an mga honorableng consejal nin Virac. Nagbuhos nin diyes metros sa tampad nin runway, dae na nasundan hanggan kan Lunes.
An pacahona siguro kan ingeniero nin DPWH y contratista mga ukay an gatukaw diyan sa consejo, he! he! he!
Dae pa man nag-abot an equipaje nin LGU na maarado kan kinutkot para matanoman nin camonte orawang dae pa nabuhusan.
Kung talagang dae nang cuarta an contractor, kahoronon na sana caini an site engineer, an mga amo sa DPWH magpoon qui Director Virgilio Eduarte asin an quality control, pati na siguro an COA, na kung bakong semento, riwoy na sana o gawgaw an ihalo sa graba y baybay, he! he! he!
Tutal, talagang capital riwoy man an proyectong an, matapos na bawasan nin veinte porsiyentong ganancia sa mayor na contractor, diyes y ocho sa congresistang duwa, tig-tres sa DPWH y auditor, y diyes man sa subcontractor na daeng imo, he! he! he!
*****
Sa mga masunod na aldaw o semana, an mga consejo municipal y an junta provincial mapaapod nan in mga public hearing manongod sa mga proponidong ley kan satong mga honorable.
An mga invitado, lalo na an publico (bako sana an mga macuapo ni Nestor), pinapakimaherakan na mag-atender, magdangog y magsabot kan mga ordinansa kan mga honorable.
Ini bako sana na masuportaran an mga toltol na ley kundi hagadon sa consejo na ibasura an daeng camogtacan na imbento kan satong mga binotohan.
Diyan sa Virac iguang limang proponidong ley na diniskutir sa public hearing.
An saro gigibohon na commercial zone an sanggatos metros sa cada gilid kan national road magpoon sa boundary kan Virac y Bato hanggan sa Sinibaan bridge sa Capilihan, sakob pa an kadagaan hanggan sa boulevard na diit-diit nang napano nin mga tindahan y inuman.
An resulta caini, mamahal an buwis sa daga sa lugar na ini y an pagbakal man nin daga mahalangkaw.
An saro man na ordinansa planong gibohon na krimen an paghuba nin pang-itaas na bado sa tinampo o arin man na pampublicong lugar (dae kabali an harong ni Nestor).
An icaduwa mabawal man sa pag-igtok sa kalye, sa gilid nin tinampo o sa plaza.
An duwang ini pareho nang pigabawal y consideradong krimen sa irarom kan Revised Penal Code bilang mga gibong alarm and scandal.
Bahala na siguro an satong mga honorable, pati na an mga representante nin accredited na CSO, na hagayon an mga ini tanganing mga mapakinabangan sana an magin ley.