Makakua palan nin diyes milyones pesos an Capitolyo hari sa DOLE para sa soboot emergency employment kan mga trabahador na naafectaran nin habagat.
Ipaagui daa an asistensya sa TUPAD para sa mga tawong binaha, natilisan o iba pang pangyari dahilan sa nacaaguing mga bagyo asin habagat.
Sa pagkaisi nin cadaclan, dae man nin nabareta na afectado nin habagat, pag-uran o pagbaha, afuera na sana siguro sa mga parasira na dae nakalawod kang macusog an dagat.
Sayang na naman na fondo ini, lalo na kung palimpyahon na naman sa gilid nin tinampo na cotana responsabilidad nin mga kagharong o caya kan barangay.
Sayang na dae kabali sa mga recipientes an mga naafectaran kan nacaaguing habagat kan July 1, an mga tinarangkas sa trabaho ta tutukalan naman kan mga alipores nin bag-ong amo.
Cadacul cotana caini, lalo na itong talagang dae man nin pakialam sa politica y sige sana an servicio sa publico.
Pareho sa mga intrevista sa mga gaaplay sa trabaho, an importanteng simbagon na hapot iyo ini: kisay ka nagvoto kang Mayo dose?
*****
Didiit palan mag-walkout an mga capitan sa pamiting nin DSWD asin an oficina ni Cong Yoloyo manongod sa AKAP, an Ayuda sa Kampanya nin Politico, ay sana, Ayuda sa Kapos ang Kita Program palan, he! he! he!
Dati na daang nagreklamo an mga capitan del baryo por sobre ta magpoon kan Oktubre 2024, pakatapos kan filing nin CoC sa Comelec, sunod-sunod an panaltag nin AKAP sa mga residentes nin barangay sa bilog na provincia, alagad sa mga parasunod sana ni Cong Yoloyo.
Saro pa, an mga nakalista, minsan pinaagui sa mga capitan an papeles, sarala man siyempre an mga pangaran pati na an kinamundagan na petsa.
Igua nganing mga bako man qualificado na nakalista y inako pa nin DSWD an sertipikasyon na firmado sana nin kagawad, minsan presente man an capitan.
Tapos na man cotana an eleksyon caya dapat na matawan na man an dae pa nakarecibe nin AKAP na mga kulang an ganancia.
Mayad pa daa an nanartag na congresista o gobernador ta dae na caipuhan magpalista para makakua nin ayuda. Maapod sana sa contratista, igua nang cuarta, he! he! he!
*****
Inaapodan an Provincial Agriculture Support Office o caya an municipal agriculturist nin Virac na inspeksyonon an patrabaho kan contratista diyan sa kahalabang tinampo sa tampad kan airport, lampas pa nin CatSU hanggan sa may Fiat Village.
Helingon an dae nabuhusan na mga dagang hinarian nin lumang baldosa kung puedeng aradohon tanganing matanoman nin camonte, hope, okra o pechay.
Duwang bulan nang dae nabuhusan nin kongkreto an mga kinutkot kan subcontractor na dae nakabakal nin semento ta daeng imo.
Tibaad lamang abutan pa nin duwang bulan an pagkaatraso, puede pang mag-onod an camonte o hopi o caya magtalubo an pechay o okra. An onod, dahon o bunga puedeng itao sa mga estudyanteng dae nakabakal nin gulay ta naubos sa load o inumun, herac man….
*****
Saro palan daang halangkaw na opisyal sa capitolyo an nag-apod na sa jefe nin pulis sa Isla Maogma na mapoon na sinda magpa-lotteng.
Dae cierto kung ano an sinimbag ni PD Cereno, na dati nang inorderan ni Gob Azanza na dakupon an gabos na mga ilegalista sa Catanduanes.
Dae man isi kung iguang basbas nin kagurangnan an pagpa-lotteng ni Victor Wood o an pagpaaram sa Campo Camacho.
Maisihan ta na sana sa mga maabot na aldaw kung nagpadagos an bolahan sa mga barangay pati an bolahan sa capitolyo, he! he! he!
Gusto sigurong ipalugi an Black Talon tanganing masalidahan man, he! he! he!