Kung hinari man an cadaclan kan mga job order na empleyado sa Capitolyo, halos naubos man palan an mga job order workers sa DPWH Catanduanes District Engineering Office.
Segun sa mga chismoso, nakaiba daa sa mga dae na binali sa listahan an mga taon na an binilang sa San Isidro Village, pati mga ingenierong gahalat man sana nin tiyempo na makakua nin permanenteng posisyon.
Kabilang daa sa mga victima an mga kadugo kan mga lideres kan duwang congresista sa Batalay House of Representatives na an hona-hona dae sinda matatangkas dahil sa koneksyon.
Dati nang sinabihan kan tawo-tawo sa posporong District Engineer an mga gustong ma-promote o ma-retain sa puesto na maglakaw papuntang Batalay y maghagad nin basbas sa mga amo.
Sa ngonian, daeng maguinibo an mga afectado kundi maghalat kung magbag-o an isip kan mga poderoso. Masakit pa naman makahanap nin trabaho sa privadong companya sa construction ta dae man nakakua nin proyecto kung dae kabali sa listahan nin mga masuwerteng makabayad nin advance, he! he! he!
*****
Bako nang kananari kung sa maabot na semana o bulan, maisihan na sana nin publico (pati an mga macuapo ni Nestor) na kapot na kan presenteng administrasyon an mayoriya sa junta provincial.
Kung paka-eleksyon duwa sana an bocal ni Gob Pat sa SP, madagdagan ini hari sa walong kapot kan dating administrasyon na ngonian an lider si Bise Gob Obet.
Sabi ngani kan mga tahodan na politico, masakit magmantener nin mga tawo lalo na kung kulang man an pangkurukay y dae kayang aseguraron na an saendang mga kanya-kanyang programa o proyecto mataohan nin fondo.
Kung an sarong politico dae makaamot nin pambubod sa manok sa laog nin tolong taon bago an Mayo 2028, dae na siya magbali sa derby ta daeng entry fee o pampusta, he! he! he!
*****
Gaagrangay na daa an mga gasolinahan na kakumpitensya kan Powerzone.
Masyado daang hababa an pabakal caini nin gasolina asin crudo, nabawasan nin golpi an saendang deligencia.
Iyo na ini an problema ninda, ta kapot kan companya kan mga Cua an fuel depot na an laog sobra sa anom na milyon na litro nin gasolina asin crudo.
Segun sa ley, deregulated an presyo nin anuman na petroleum product sa enterong Pilipinas y puedeng itaas an pump price caini masqui anong oras nin daeng paisi sa autoridad, lalo na sa Department of Energy.
Alagad sa presenteng camogtacan kan politica sa Isla Maogma, masakit ining gibohon lalo na kung aban-aban sana an pa-posing kan bag-ong gobernador sa mga karatula nin presyo sa mga gasolinahan, he! he! he!
*****
Sa laog nin sarong semana pakatocaw kan bag-ong administrasyon, duwa na dagos na agencia de gobyerno an nagsalida nin amo.
Enot si Col. Edward Quijano kan Catanduanes Police Provincial Office na sinalidahan na ni Col. Elmer Cereno kan nacaaguing Viernes.
Dati na daang napili ni Gob Azanza si Cereno na maging amo kan kapulisan sa Isla Maogma caidto pa, alagad dae daa napaboran kan nacaaguing administrasyon.
Dae siguro nagustohan kan gobernador an palakaw kan namaaram na PD lalo na kan panahon nin campanya.
Kan Lunes naman, igua nang bag-ong amo an DepEd Division of Catanduanes ta nag-asumir na sa trono an bag-ong OIC iyo si Ma. Jeany T. Abayon.
Dae pa man nin osipon kung ano an dahelan kung ngata binuhian na an dating OIC Cecile Ferro.
Arin pa daw na agencia an makahiling nin bag-ong amo bago matapos an bulan na ini?
Posibleng an DENR diyan sa San Isidro Village an magsunod, lalo na ta bantog an amo caini na sige an lamyerda para mag-atendir nin kung ano-anong miting sa region o sa Maynilang kayganda, baya an mga pirmahan na documentong na siya sana an makarosnos.
Cierto an mga ingeniero y contratista na dae cabali an DPWH ta an maboot iyo an Human Resource Management Office duman sa Batalay House of Representatives, he! he! he!