Nagpasensya an gabos na consumidores nin Dificelco sa nangyaring brownout kan fecha 29 nin Hunyo minsan dae nin isi kung ano an tunay na rason caini.
Pasalamatan ta an National Power Corporation y an DPWH ta sinda an causa kan pagpalsok nin corriente sa laog nin anom na oras.
Ini daa ginibo para matawan nin panahon an NPC na ilipat an transmission wires na nakaolang sa ginigibong daculang gymnasium sa daga nin CatSU.
Maguiromdoman na dati nang pigreparo an paglipat kan proyecto duman dahil sa transmission line kan NPC sa itaas.
Segun sa ley, bawal an pagtogdoc nin anuman na edificio sa irarom kan inaapod na power line corridor y an sisay man na mabalga soboot papatawan nin penalidad sa korte.
Alagad, imbes na an DPWH an maghiwas para inahap nin ibang lugar na mayang, an Napocor pa an napilitan maggastos nin sobrang sarong milyon para sa bag-ong poste y mga kable nin corriente, dae pa cabali an binayad sa labor y an molestyang dinara sa mga consumidor.
An gustong sabihon caini, puede man palan barion an ley para sana maacomodar an proyecto, basta sa gobyerno, he! he! he!
*****
Saro dagod an nareparo nin cadaclan kan magtao nin mensahe an bag-ong gobernador duman sa Capitol dome kan Lunes.
Sa mga nacatocaw na visita, an naheling sana kan magtindog si Gob Pat sa rostrum iyo an saiyang payo, he! he! he!
Dae lamang nakaisip sa transition team na bakong kapareho ni dating Gob Boboy an matukal sa saiya.
Cotana kinahangan lamang nin tungtongan na kahoy o caya nagdisponer nin basyong kaha nin serbesa, Siguradong pagkaaga, an enot na ipagibo sa mga Carpintero kan PEO, serotsohon an sarong dangaw na parte sa ibaba kan demonyadong rostrum, he! he! he!
*****
Kinulang palan an arambagan kan mga bocal y bise gobernador kan sinda magpasumpa nin laen kan Sabado, Hunyo 28.
Dakul daa an nag-abot na visita y mga usisero minsan duwang PBM y saendang mga familia an dae nakaatender, caya siguro nagdagdag an caterer nin singil.
Naisihan siguro kan mga nakihabhab na naglaenlaen man an grupo ni Bise Gob Obet ta an gusto ninda maghanda nin pangodto, mantang an pormal na inagurasyon kan Lunes mirindalan sana an handa, he! he! he!
Cotana nagkahang sinda nin guardia civil sa entrada kan lugar y an pinalaog sana iyo an imbitado tanganing igua man nin matadang darahon an mga parasunod ni Sharon, he! he! he!
*****
Padagos palan an pakiamiga kan maboot na congresistang gatindog kan Batalay House of Representatives.
Inapodan man daa caini si alcalde Glenda Aguilar kan Caramoran kan sarong semana y direktang sinabi na siya poderosong gayo y caipuhan na an alcalde magsungko na sa saiya lalo na pilay-pilay na an mayora.
Grabe daa an hapdos kan boot kan alcalde alagad dae man sinabi kung ano an sinimbag caini sa kahagadan kan icatolong congresista.
Tibaad gusto man sanang makatabang an congressional district office sa camogtacan kan alcalde. Papirmahon siguro sa petisyon para matawan man nin ayuda an mga PWD, he! he! he!
*****
Sagcod ngonian, dae pa nabuhusan an rinungkab na baldosa diyan sa tampad kan CatSU na proyecto nin DPWH regional office.
Segun sa huringhuding, dae na daang semento an subcontractor caini ta minilyon na an utang sa supplier.
Igua pa ngani diyan nin saday na parteng pinatagas an sobrang semento. Bawal ini sa reglamento y caipuhan harion bago buhusan.
Kung dae pa makadisponer nin semento an subcontractor, apudan ngona an BFAR tanganing mabuhian nin tilapia an mga tinubig na toho, he! he! he!