Kung nagpahayag na an matucaw na hade nin capitolyo na ipapasunod niya ang meritocracy sa pagpalaog nin tawo sa gobyerno provincial, iba man an estilo ni Cong Yoloyo y pag-iriba.
Segun sa mga chismosong empleyado sa DPWH, igua daang solamenteng aplicante sa sarong bakanteng posisyon sa accounting office.
Ta saro man sana an nag-aplay, dagos daa dinara sa regional office an papeles caini tanganing ma-appoint na ni RD Eduarte.
Alagad, igua pa palan nin sarong rekisitos an oficina ni DE Arias: caipuhan daang magpunta ngona sa Batalay House of Representatives tanganing mabasbasan, he! he! he!
Bako sana daa ini an tinarman kan amo nin mga capataz, igua pa daang saro man na aplicante sa iba man na posisyon an tinugon na mag-aparecer sa atubangan kan congresistang gatocaw asin contresistang gatindog.
Igua pang icatolo: ang pinili ni San Simon na matukal bilang OIC sa nabakanteng posisyon sa Planning Section sinabihan man kan bag-ong reglamento ini kan Civil Service Commission sa appointment y promotion kan mga personajes sa DPWH Catanduanes.
Kung ang qui Azanza meritocracy, ang estilo ning Batalay House of Representatives peritocracy, he! he! he!
Tibaad dae ta sana naisihan, baad nagpasar na nin resolusyon an congressman na gatocaw na an gabos na aplicante sa arin man na trabaho sa oficina ni DE Arias caipuhan ngonang magsamba sa Shrine of the Holy Boss sa Batalay, he! he! he!
Sagcod kan nacaaguing semana, dae pa daa nagtubod an tolong tawong kinahoron ni DE na maubos na an buhok sa pag-atubang nin mga problema sa Islang Maogma.
Dae pa ngani nacatocaw sa icaduwang termino bilang representante, gahapot na an mga taga-DPWH kung noarin malayas sa puesto an duwang congresista.
Sukat nang….
*****
Kung sisay man an iguang malasakit sa buwis na satong pigabayad sa gobyerno, dapat na bantayan na nin husay an mga patrabaho nin DPWH sa Isla Maogma.
Ang pigatusang kan contratistang taga-ibong diyan sa highway sa iguang aeropuerto dapat tang guilomdomon na binuhusan yan mil nuevecientos sitenta, duwang taon bago an martial law.
Ang gustong sabihon, uminabot nin cincuentang taon an baldosang an, oro-aldaw piga-a guihan nin mga vehiculo.
Icomparar ini diyan sa sinalidang kongkreto sa cadaclan na parte kan Moonwalk, trinabaho kan panahon nin pandemya dae pa ngani limang taon.
Alagad ngonian, an igua nang mga baldosang ampaw na an ibabaw, saro sa pinakamaluyang trabaho sa istorya nin DPWH.
Sabi ngani kan sarong motorista, mayad pa daang an pasemento sa national road diyan na sana sa Moonwalk ibaryo ta mas malala an camogtacan kan tinampo, mantang an diferencia kan pigatusang ngonian batak man sana y bako man na ampaw.
Segun sa sarong sehongan na ingeniero sa oficina ni DE Arias, an proyectong an contrata nin GCI alagad an gapatrabaho sarong RG Mercado na soboot subcontractor.
Kung gurano an presyo kan pagka-subcontract, dae ta isi pero ciertong hababa pa ini sa sitenta porciento kan orihinal na contrata.
Isipon nindo, enot na babawasan nin veinte porciento para sa politico, advance pa. An orihinal na contratista natural iguang minimum na diez porciento y an mga taga-DPWH igua man diit na babarangabangaon.
An matada sa subcontractor tonok, caya an posibilidad na toltol an pakatrabaho sa proyectong ini harayo sa totoo, pwe!
Iyan an dahelan kung ngata dacula an panaltag kan mga politico kung panahon nin eleksyon, na babawion man sana….