Inaapodan an mga disipulos kan santong district engineer diyan sa San Isidro Village.
Iguang parabaylay na nagreparo kan drainage sa gilid kan highway diyan sa Gogon.
Tibaad lamang daa malabnot an mga lubot nindo sa tocawan y mainspeksyon an drainage na ini ta baging barado na.
Saro daang senyal iyo an pirmi asin madaring pagbaha diyan sa tinampo na tampad kan kapilya nin San Rafael masqui diit sanang uran.
Kung hehelingon daa an luwasan kan kanal diyan sa may tulay nin Gogon sa may saod, dae na o diit sana an ilig nin tubig.
Alagad kung sisil-ipon mo daa an kanal duman sa may simbahan, halos cabanga an laog.
Posibleng sa panahon na ini, pigailokan nan in kitikiti asin lamok an laog kan kanal, na posibleng magi naman na dahelan nin paglangkaw kan kaso nin dengue.
Cadaclan pa naman na mga ciudadanong daeng pambakal nin aircon, mahuba na sana ta dae kaya an init o anangaang kan ventilador.
Hoy, mga ingeniero, foreman y capataz sa maintenance, maghiwas man kamo! Dae na maghalat na reparohon ini bago mag piyesta sa Oktubre, pwe!
*****
Segun sa mga huringhuding, nag-orden na daa an juez sa RTC Branch 43 na darahon ngona sa Maynilang kayganda an mga ballot box y an Automated Counting Machines (ACM) pa ini ma-authenticate bago pa man repasohon an mga voto sa Bato sa pagka-alcalde.
An gustong sabihon, bubuksan da aini duman, hehelingon kung iyo talaga an nadestinong maquina sa cada presinto, bibilangon asin ikumparar an mga numero kan balota kung iyo an itinao kan Board of Election Inspectors sa mga votante y kung ano pang mga procidimiento.
Ta an pagrepaso daa kan mga balota sa protesta sa posisyon na gobernador duman gigibohon sa COMELEC Manila, dacula an posibilidad na duman na man gigibohon an mga pagbukas y pagbasa kan mga balota sa enterong provincia.
Maguro-gastos ini, lalo na ta an gastos sa pagbiyahe kan mga ballot box asin ACM ipabayad sa nagprotesta sa paagui nin pagbawas sa bond na diniposito ninda sa Corte.
Kung caidtong panahon na mano-mano pa an votohan, an pagrecount nagsentro sa surat kan mga votante, lalo na sa ispeling kan pangaran nin candidato na sinurat kan votante.
Kung nakaagid an surat kan votante sa pangaran nin candidato, bibilangon ini para sa saiya.
Alagad ngonian, an mayor na trabaho kan mga rebisador iyo na helingon ang pinaaguihan kan pentel pen na mga blangkong bilog, lalo na itong dae binilang kan maquina ta kulang ang tinta.
Segun sa mga eksperto, kung hababa daa sa quince porciento kan bilog an natintaan, dae daa bibilangon kan ACM, minsan pa ini para duman sa candidatong pinili kan votante.
Iyan an pagdudulakan kan mga rebisador y abodago kan lambang lado sa protesta.
Kung harimbawa sa veinte porciento kan presinto, makalamang na an nagprotesta, puede niya nang itonong an bilangan. Alagad kung dae pa man, puedeng isunod naman an veinte porciento hanggan na siya makalamang o uboson na an gabos tanganing sigurado.
Ngonian kung an pigprotestang kalaban dae nag-file nin counter-protest, dae siyang maginibo oras na tonongon na an pagrevisar kan balota ta nakalamang na an nagprotesta.
*****
Dae na ma sarong bulan, matukaw na an mga bag-ong hade sa capitolyo y mga municipio nin Virac, San Andres, Pandan, Bagamanoc y San Miguel na babayaan kan mga naderotang amo.
Afuera sa nerbiyos asin kagamohan kan mga opisyales y empleyados, an saro sa mga afectado iyo an mga contratista man na tinawan nin proyecto bago man magpoon an campanya.
Gakaramaskamas na an mga ini na taposon an mga proyecto y mabayadan sinda bago pa man maglayas an mga derotado.
Ta kung dae mahaman, ciertong lugi an mga ini ta madodoble sa sisingilon na SOP, he! he! he!