Magpasensya daa an mga dae naregalohan kan Santa Claus hari sa Batalay House of Representatives, lalo na itong mga nagrusob sa mga ward leader na naglista kan mga recipiente.
Segun sa sarong pilyong Catolico, tibaad daa nagpadara pa nin panaltag si Cong Yoloyo sa Roma para maelegir si Pope Leo.
Caya ngani grabe an caogmahan kan congresista kan makaluwas si Cardinal Robert Prevost, dagos nagpost sa Facebook si “Papa Leo” qui Pope Leo XIV sa paghonang makadagdag ini nin voto, he! he! he!
Sabi man kan campo ni alcalde Samuel Laynes, sabay man daa sindang maselebrar nin compleano kan Santo Papa sa Septiembre 14, dae invitado an Papa Leo, he! he! he!
*****
An mga naderota kan Lunes tibaad nagparadangog kan famosong cancion ni Frank Sinatra, ang “My Way,” lalo na an primerong linya: “And now the end is near….”
An dasal nin mga autoridad iyo na dae lamang otro mangyari an apat na sunod-sunod na suicide kan mga nacaaguing semana.
Ini daa lalo na ta dacul an nagprenda o nagpabakal nin daga, carruaje pati na resibihon na sueldo asin retirement tangani sanang iguang maipambubod sa mga votante.
Duman daa sa Bato, an pinakamayaman na lugar para sa mga votante, lalo na na aduman an Batalay Central Bank, Batalay House of Representatives y Batalay District Jail, uminabot daa sa dos mil quinientos cada an pangkurukay kan campo ni Yoloyo.
An problema daa, kulang an suportang itinao sa mga candidato kan grupo, caya an mga ini kanya-kanyang disponer.
Su saro ngani daa, pati negosyong tubigan, kaibahan an duwang topdown na pang-deliber, pighanapan nin buyer pirang aldaw bago mag-eleksyon, he! he! he!
*****
Grabe an efecto kan taraltagan na nangyari (dae tabi cabali an mga daeng imo).
Hueves pa sana, dae na nagpalawod an mga parasira, caya pag-abot nin Viernes hanggan Lunes, daeng bag-ong daling sila sa saod, an aduman mga ilado na, mga puti na an malsok.
Pati mga katabang sa harong, binayaan an mga amo Sabado pa sana ta tibaad dae ihubon kan Santa Claus an regalo kung dae sinda magbantay.
An mga nakakua na nin binubod, namarakal na sa Taiwanese nin mga baratong gamit sa harong, caya gananciado an mga traysikel na kargado nin mga plastic cabinet asin iba pa.
Kan Domingo, selebrasyon kan Mother’s Day, namate man kan mga mahilig sa habhab, ta pano-pano an Jollibee y McDo, dae na masabotan kan mga paraluto kung papan-ohon an mga customer.
Duman ngani daa sa Kemji, nag-leave an ibang kusinero asin parasirve, caya an natadang waiter sa Lanai area saro na sana. Kung dae ka daa nag-order nin alas ocho para sa pagkaon nin alas dose, aabutan ka nin dos oras bago manakamit nin putahe.
Kan Lunes, cadaclan man na mga tindahan sa Virac sarado ta an mga empleyado dae na nagralaog.
Sa otro eleksyon, magayon na abisuhan an mga candidato na amayon man an panaltag tanganing dae man magparabarantay an mga votante sa harong.
O caya magkahang na sana nin kahoy na kahon sa atubangan nin harong, igua sanang toho na makalusot an envelope, he! he! he!
Para sa mga sabon, noodles, kape, balde, shampoo, tinapay asin iba pa, howaan an lanob sukol sa balde, kanghan nin puertang sera-sera, he! he! he!
*****
Mapirilian na naman palan kan bag-ong presidente nin CatSU.
Natural, an resulta kan votohan sa BOR madepende sa politica kan mga candidato. An saro manok kan dating presidente y an saro pirming visita sa Capitolyo, mantang ciertong an icatolo tondaon.
Ini afuera na sana kung magdesisyon an BOR na taga-luwas an patukawon y makinabang….