Igua palan nin pigabalangibog na survey daa an grupo kan dating halangkaw na opisyal kan Cesar State University.
Segun sa soboot survey nin taga-ibong sa sobrang cuatro mil na votante nin Isla Maogma, labing sitenta porsiyento daa an pabor sa hadi nin palasyo sa San Isidro mantang dai pa ngani veinte porsiyento an gusto sa bise gobernador.
Sa pang-apat na puesto, gapaagawan daa an dating heneral y si Atorni Puting Buhok na iguang tig dos cientos na voto.
An hapot, painano man daw ginibo an survey na nagluwas sa Facebook?
Nagviaje an mga taga-ibong para personal na hapoton an labing cuatro mil na votante sa manlaenlaen na banwaan y barangay sa Isla Maogma?
O dae na nangahas magsakay sa lantsa y nagparahapot na sana sa mga mahilig sa Facebook?
Mas katutubod pa ang face-to-face survey na ginibo nin mga taga-University of Prensahan na arquilado nin sarong partylist group sa rinibo man na votante sa onceng municipio.
Duman, halos sisenta porsiyento an mavoto sa bise gobernador kontra sa treinta porsiyentong pabor sa dating halangkaw na opisyal nin CatSU.
Dae ta man puedeng sabihon na gapahalangkawan an duwang candidato sa pagka-gobernador ta pareho man sindang hababa, he! he! he!
*****
Bago maniwara sa mga gakalat nang mga resulta kan survey nin Bicol Research and Survey Group, magayon na visitahon an website kan companyang ini tanganing masabotan kung pano nakua an resultang kadududa.
Duman maheling na puede ka magvoto anuman na oras basta ika daa rehistradong votante y puede ka magvoto nin tolong vez cada aldaw.
Entonces, kung candidato ka, puede ka magbayad nin masqui quinientos na tawo para magvoto saimo sa survey na ini tolong vez cada aldaw tanganing madagdagan nin mil quinientos cada aldaw an suma total kan voto mo sa survey, he! he! he!
Minsan nakakahang sa website an soboot panahon na ginibo an survey, clarado na puede magvoto an sisay man na herodes minsan anong oras, basta hanggan tolong vez sana cada aldaw.
Kung parareho man sana an mavoto sa candidato sa website na ini, dae man nin halaga an resulta kung ini babasehan nin stratehiya sa campanya.
Bagui man sanang gatubod sa bobowa an candidato, he! he! he!
Buro banggui siguro pigabasahan nin fairy tale na Snow White and the Seven Dwarfs an candidatong ini kan siya aqui pa, he! he! he!
*****
An saro pang kadududa sa survey na ini, hahagadon an saimong pangaran, edad, numero nin selpon y an email address.
Cadaclan matao kan datos ta maisip na saying man an voto niya sa survey.
Dae man nin nakakahang sa reglamento na caipuhan magtao nin personal na impormasyon na puedeng gamiton kan companya sa kung anong katuyuhan.
Ni dae man nin anuncio an companya na an anuman na isumitir na impormasyon magiging confidential y dae ninda puedeng gamiton sa kung anong dahelan.
Adyan an posibilidad na an impormasyon na ini ipabakal sa mga candidato tanganing macampanyahan.
Iyan an posibleng ganancia sa survey, he! he! he!
*****
Gigibohon na naman palan an Discutiran sa CatSU kan mga candidato.
Inimbitaran na daa an mga ini kan mga organizer, na an cadaclan daa suportador nin gaambisyon sa Capitolyo.
Alagad, nagsayuma na daa an magcapirang candidato na habo sa format kan discutiran.
An cierto daang maatender an dating halangkaw na opisyal kan escuelahan y si Atorni Puting Buhok.
Isi na nin gabos kung sisay sa mga candidato an malasayan kan malanit na pananaramon kan abogadong taga-Bato, he! he!