Puede palan daang mangampanya para sa saendang mga candidato an gabos na elegidong opisyales sa barangay, kaibahan an mga SK.
Ini segun sa COMELEC, na nagbasar kan saendang resolusyon sa desisyin nin Korte Supreme na an pagbawal sa mga barangay officials na makidawdaw sa partisan political activities limitado sana sa mga nasa servicio civil na mga opisyales y empleyados.
Alagad, sabi sa Minute Resolution 24-1001, an mga ini dae puedeng maghagad nin tabang pinansyal sa saendang mga tawo o caya orderan sindang gibohon an mga bagay na prohibido kan Omnibus Election Code.
Sa gobyerno man, puede man makidawdaw sa pangampanya an mga empleyadong job order (JO) asin contract of service (COS) ta bako man sindang nasa servicio civil minsan pigabayadan nin tesoreria an saendang trabaho.
Bako man caya sindang mga permanenting trabahador y daeng sindang employer-employee relationship sa gobyerno.
Nagpatanid an COMELEC na minsan puede mangampanya an mga casual na empleyado, sakob sinda kan ley pag-abot sa mga bawal na actividad.
Damay man an mga opisyales nin gobyerno na gagamiton an mga JO y COS sa saendang campanya.
Bahala na caini an mga kalaban magbantay kan pagbalga sa reglamento kan COMELEC, basta dae sinda magtao nin dahelan para sinda man an balosan, he! he! he!
*****
Nagpagiromdom man an Bangko Sentral ng Pilipinas sa publico (kaibahan an mga makiimong macuapo ni Nestor) sa toltol na paggamit nin imong papel y plastic, pati na an mga sinsilyo.
Segun sa Presidential Decree 247, ang tuyong pag-uyag, paggisi, pagpaknit y pagsulo nin cuarta nin republika puedeng padusahan nin penalidad na veinte mil pesos pati pagkakulong nin abot sa limang taon.
Kabali tabi dindi an pag-stapler nin papel sa papel o plastic na imo siring kan mga gawe nin mga candidato kan mga nacaaguing eleksyon.
Sa pagheling kan mga nakahapiyap pa nin manangribo, medyo delicado daang gamitan nin stapler an polymer na cuarta ta tibaad magisi y dae na lugod akoon na pambayad sa saod.
Caya inaabisuhan an mga manaltag sa oras de peligro sa Mayo na mamakal nan in scotch tape sa mga tindahan nin office supplies habang igua pang supply.
Inotan niyo na habang dae pa nakaisip an mga negociante na dagdagan an presyo nin tape, he! he! he!
*****
Veinte pesos na sana, maabot na sa cuatro cientos an presyo nin carneng orig sa saod nin Virac.
An rason daa caini ta kulang na an nababakal na buhay na orig sa kataraning na lugar dahel sa ASF.
An bakal daa sa live weight gaabot na nin dos cientos veinte sagcod dos cientos cuarenta, dagdagan pa nin resikong veinte hanggan veinte cinco kilos cada orig, caya hababa na daa an kita kan mga parabuno y paratienda nin carne (dae tabi kabali hilaw na carne sa Calle Mabole).
Herak man kan mga consumidor, atang kaminahar na kan sila sa saod kung igua, baad sarong vez na sana maasaytihan an kimot nin humba cada semana.
Mayad ini sa mga helangon na binawalan na kan saendang mga doktor na maghabhab nin carne, orig man o carbaw, tanganing maghalawig an buhay.
Mas lalong dae magamit nin mga candidato an carne na panartag sa maabot na eleksyon, siring sa ginibo nin mga parabonong candidato caidto arog sa dating alcalde nin Bato y saro pang dating consejal.
Puede sigurong arogon su kagawad nin barangay sa Calolbon na an rinibot sa baryo tig-sarong tasa nin balaw na binakalan sa ibong, he! he! he!
Ano daw palan an gigibohon kan consejo o caya kan DA kung maimponer nin Maximum Suggested Retail Price pareho sa Manila?