Igua na daang nangyaring caribocan duman sa Calolbon, segun sa huringhuding.
Sagcod ngonian, dae pa man nacierto kung ano talaga ang nangyari ta dae pa man nag-aparecer sa cuerpo de policia an victim ana capitan del baryo ning Codon.
Sabi kang mga nacaisi, an insidente daa nangyari sa barangay Datag habang sakay nin traysikel ang victima kaiba ang miembros nin saiyang familia.
Segun sa chismoso, tinaningan daa ini nin sarong suspechado na naka-bonnet, naka-helmet y igua pang face mask na nagbaba sa sarong motorsiklo na pigamanejo nin kaibahan. Igua pa daang duwang nakamotor na soboot iguang badil na nakabantay sa inotan.
Ang mayor daang suspek iguang darang tubong galvanizado na iyo daa ang pinakol sa capitan.
Narugado daa an duwang kamot kan victima ta iyo an ginamit para isangga sa tubo.
Politica daa an dahelan alagad dae man sinabi kung sisay an kalaban na magibo caini sa saiya o sa anong laban sa politica an invuelto, kung sa alcalde, bise alcalde o gobernadora.
Halaton ta na sana siguro an anuncio ni capitan pakatapos niyang magreclamo sa pulis.
*****
Pinaluwas na palan kan Comelec an mga kopya nin COC kan mga candidato magpoon senador pababa na makimahelak nin voto sa banwaan ngonian na Mayo dose, dos mil veinte cinco.
Helingon ta daw kung ano an nakakahang sa mga papel ninda.
Enoton ta an mga gustong magtocaw sa babayaan na puesto ni Boboy Cua.
Duwa sa mga candidato parehong minundag nin Deciembre mantang an duwa sa katahawan nin taon.
Si retiradong heneral nin fuerzas armadas na si Macairog Sabiniano Alberto duman sa QC minundag kan Dec. 6, 1964, entonces goslab na man ini. An agom ni dating Jessica Olasiman negociante na daa ngonian, pero inda kung aduman sa Napo, Pandan an tindahan caini.
Deciembre 18, 1968 man enot na nacahangos si Patrick Alain Tejero Azanza sa sarong ospital sa QC. Educador an kinahang niyang propesyon minsan bako na siyang conectado sa CatSU, kung saen kaibahan niya sa saiyang termino an agom na si Jane Rose.
Si Peter Chua Cua y Oliver Todoc Rodulfo parehong sa Isla Maogma minundag. Duman sa Calolbon si Bise Gobernador Bosste na maselebrar nin ika-59 na taon sa Hunyo 17 kataning kan esposa niyang si Teresita.
Si Pay, an pamosong komentarista na taga-Bato sa Catanduanes Tonto, taga-Calolbon an naagom, an dating Zenaida Soneja. Seksi an edad ngonian ni Atorni Puting Buhok, baliktaran na 69, bago ini magbertdey sa Hulyo 6.
Ta cadaclan man sa mga taga-Isla Maogma mga arog-arogon sa mga Intsik, helingon ta daw an camogtacan kan mga candidatong ini sa Year of the Snake. Kung Hei Fat Choy!
Base sa saendang fecha nin compleaño, an dating heneral sarong Dragon (2024, 2012, 2000, 1988, 1976, 1964, 1952).
Sabi ning pungsoy expert diyan sa Sta. Cruz, hayahay daa an magiging buhay nin mga dragon y dacul an oportunidad na halangkaw an tsansang manyari. Alagad, tibaad sa kabisihan, maringwan na an familia.
Caya kung mangampanya si ser, ibahon siguro an agom y aqui tanganing dae makasikyod nin magayon na bitis, he! he! he!
Namundag palan sa Year of the Monkey (2016, 2004, 1992, 1980, 1968, 1956, 1944) an educador. Segun sa ekspertong dacula an tulak, dae daa ngona magpakalag an mga ukay hanggan Marso para maiwasan an caribocan o kawaran nin cuarta. Mas lalo daang masikat an mga ukay, lalo na sa mga sosyalan, alagad luway-luwayan sana an habhab tanganing dae maghelang, total dae na man kamo mahalangkaw, he! he! he!