Nag-imbitar siguro an amo sa DPWH nin monghe o consultant sa pungsoy para hanapon an nakadimalas sa oficina.
Segun sa mga mataba an sihong sa SIV, inocupar da ani DE San Simon, na bako man Intsik, an magcapirang mga carpintero para bagohon an saiyang oficina base sa naheling sa pungsoy, o an pagtubod nin mga taga-Tsina sa pagsalugar nin mga gamit o parte nin harong para magin marinas an buhay.
An saro daang puertahan na cotana agihan kan mga clerk y alalay kan DE, siniraduhan ta dimalas daa. Caya kung maacuder sinda kung macamate nin calaen an amo, caipuhan magluwas ngona sa oficina y mag-aqui sa saro pang puertahan.
Inda kung ano pa an hiniwas na mga gamit o parte kan oficina ta bawal daang maglaog duman habang gapatrabaho. Dae man sinabi kung pati an gadiit an buhok kan amo kinonsulta pa sa fengshui expert, he! he! he!
Posibleng igua man nin basehan an pagtubod kan DE ta magpoon daa kan 2022 sa termino kan gatocaw na congresista y an gatindog na congresista, anom nang mga amo an nag-evacuar sa oficinang ini.
Naenot si DE Balmadrid na sinabod duman sa regional office, sinundan nin duwa pang DE, duwang assistant DE, y igua pang mga permanenteng empleyado sa SIV na tinamaan kan kikilat hari sa Batalay.
Ta dae man puedeng isabod sa manlaenlaen na distrito sa ibong an mga ini, napilitan si Regional Director Virgilio Eduarte na maggibo nin bag-ong oficina para sa mga sinipa nin kabayong babayi.
An mga ini natural gasueldo bulan-bulan base sa saendang posisyon, daeng bawas minsan an trabaho sana ninda mag-inspeksyon kan mga proyecto nin regional office sa anom na probinsya nin Bicol.
Ngonian, an hapot, kung pinaagui sa bidding an pagkua nin fengshui consultant kan DPWH. Ta habo man daa magpa-bidding an BAC chairman na iyo an assistant DE, tibaad dae man.
Caya dacula an posibilidad na an monghe, dara kan gatindog na congressman na dacula an paghengoha na matapos na an kadimalasan kan saiyang mga contratista sa pa-bidding.
Magayon siguro na arogon man kan liderato kan provincia an ginibo sa DPWH. Darahon man an monghe sa Batalay, diyan sa San Roque y duman sa Calatagan Proper tanganing mapaasohan an mga afectadong edificio y maabisuhan an votante kung ano an tamang isurat sa balota: numero dos o tres.
Segun sa mga Chinese astrologers, an mga masuwerteng numero sa Year of the Snake na mapoon sa Enero veinte nueve iyo an numerong dos, ocho asin nueve.
Inda kung magtubod man an mga makiperac na mga votante, na sige man an bakal nin bilog na prutas kung Bag-ong Taon…
*****
Nagpatanid an Campo Camacho laban sa soboot swindler na gamit an pangaran ni PCol. Edward Quijano para makapanghagad nin construction materials sa mga negociante, establisimiento de negocio, mga prominenteng tawo y ordinaryong ciudadano gamit an cellphone number 09648968334.
Dae man sinabi kung igua nang navictima pero base sa lengguahe, posibleng igua nang nagtao sa scammer.
Igua man daang gapamidbid bilang NPA gamit an numerong 09517720037 y 09489874735 para man mangikil sa mga posibleng victima.
Awat nang estilo ini kan mga scammer, lalo na kung bag-o an amo sa PNP o caya minatukaw pa sana.
Sayang na dae binali kan Campo Camacho an patanid sa mga constituentes na dae pagpilion sa Mayo 12, 2025 an mga dimalas, mga makiimo y mga tawong kulang man an nahaman pero alisto sa harambugan.