Marinas palan an negosyo kan satong icatolong congresista.
Segun sa osipon, bako man sana palan daa sa Maynilang kayganda nanao nin sobra sa P100 million na proyecto sa distrito nin ibang congresista, na nagcomentaryo ngani kung ngata dae ini pigadara sa Isla Maogma kung saen an saiyang esposo an tunay na congresista.
Duman man palan sa provincia nin Palawan, sobra na daang sarong bilyon na halaga nin mga proyecto an ipinabakal kan icatolong congressman sa sarong distrito nin DPWH duman magpoon pa kan 2022.
Ngonian, dae man nin diferencia kung an sarong congressman o an saiyang talagang tunay na congressman magpabakal nin proyectong hinagadan sa nadukutan na senador.
Bako man bawal an magpabakal nin proyecto pakahagada ini sa senador catucal an diez porciento na lagay. Tanganing makabawi an nagbakal, natural papatungan man ini nin cinco hanggan diez porciento na babayadan kan mabakal na mga contratista.
Bahala na man an contratista y an DPWH district engineer magpaanos kung pano hahamanon an proyecto kung an natada na sanang dapat gastoson otsenta porciento o hababa pa.
An importante cotana, darahon an mga proyectong ini sa sadiring lugar kan congresista, tanganing an saiyang constituentes an makinabang.
Alagad sa kaso kan satong mga alistong congresista kan Batalay House of Representatives, dae puede ta habo nindang an mga contrata makapunta sa mga contractor na kalaban y habo magtao nin deligencia, he! he! he!
Bako man sana sa kita nin mga contractor pati an hanapbuhay kan saendang mga trabajador an efecto kan pagdulag nin fondong ini kundi an buwis na cotana madalagan sa local na BIR.
Hilnga ta nagbaba an koleksyon kan mga taga-rentas internas magpoon kan 2023 hanggan ngonian.
Ini man an dahelan kung ngata cadacul an establisimiento sa bilog na isla an nagsara o napilitan na magbawas nin capital ta hinanapan nin butas kan mga taga-BIR para mabawi an nawarang buwis hari sa mga contrata nin DPWH na dinara ni Yoloyo sa ibong y kung saen pa.
Caya magpasensya ngona an mga taga-Isla Maogma, ta hanggan pang Hunyo 2025 an tucaw caini sa Congreso.
Mas magayon maghorop-horop pa an mga votante y magdesisyon na tucalan an gatocaw na congresista asin an gatindog na congresista bago pa man magpoon an campanya sa otro taon.
*****
Minsan bilib an cadaclan sa inaapod na tibay nin Catandunganons sa pagbangon sa danyos nin mga bagyo, saro sana an bakong magayon paghilngon.
Ini an kagustuhan kan gabos, lalo na sa mga barangay sa luwas nin poblacion, na sinda matawan nin relief goods, nadanyosan man an harong o dae.
Cotana, an mga tunay na nangangaipo sana an dapat tawan. Alagad nagimathan na kan cadaclan na sinda dapat igua man, minsan an mga harong bato y an familia iguang kaya.
Sunod man sanang sunod an mga politico magpoon congresista, gobernador pababa hanggan capitan, ta an hanap ninda mga voto sa masunod na eleksyon.
Caya mas lalong magastos an pagresponde sa mga bagyo ta an enterong mga familia an tatawan nin relief, bako sanang an mga tinamaan na tunay.
An sakong suhestyon, magdesisyon an Congreso na amendaran an Konstitusyon, bag-ohon an fecha nin eleksyon sa presenteng icaduwang Lunes nin taon.
Gibohon na sanang cada Deciembre 22 an gabos na eleksyon, mag nasyonal man, lokal o barangay y SK.
Sa paaguing ini, mabawasan an gastos nin mga candidato ta saro sanang Krismas an aaguihan ninda sa campanya.
Biriyo na an taltag nin cuarta asin pagcaon para sa Noche Buena nin cada familia sa Isla Maogma….