Ano daw ang pigatago kan DPWH sa Isla Maogma?
Habo daa magpaluwas nin black-and-white o pirmadong typhoon damage report ang manejamiento nin DPWH Catanduanes District Engineering Office.
Dae man daa ini nagsumitir nin report sa PDRRMO o kaya qui Gobernador Cua, ta cotana trabaho ini kan DPWH tanganing maisihan an efecto ni Pepito sa Isla Maogma.
Ang sabi daa kan magcapirang opisyal sa mga gahapot, an puede sana ipaluwas text message, bako an papel, ta iyo da aini an instruksyon kan mga amo.
Dae man sinabi kung sisay na mga amo. Inda kung si District Engineer Simon Arias, na dae dindi sa Isla Maogma kan bagyong Pepito ta aduman sa Maynilang kayganda para maghagad nin mabaryohan na puesto basta bako sa Virac.
Kung an pigasabing mga amo iyo itong mga gapadalagan kan Batalay House of Representatives, dae man nin sinabi an informante.
Magayon cotanang maisihan nin publico (kaibahan si Noynoy) kung arin na mga imprastraktura an mga nadanyos kan baha, suoy o hangin na dara ni Pepito.
Ta kung iguang listahan, puede bagang mapasyaran ini tanganing maisihan kung talagang totoo na nauyag (igua pano caidto nin inspeksyon sa lamesa) ta macusog an bagyo o nauyag ta palpak an pakagibo.
Igua na nganing nagruluwas na bareta sa social media na igua daang naradas na seawall diyan sa Gigmoto o kung saen.
Ngonian, kung daeng report an DPWH, natural dae man nin iinspeksyonon kung talagang totoo. Mas lalong dae maisihan kung sisay na contratista an nag-implementar kan proyecto.
Tibaad habo man si DE Arias ta iguang mailawan na politicong contractor?
*****
Kumusta man daw an seawall diyan sa Batalay kan panahon nin suoy?
Duwang parte pano an proyectong ini. An enot aduman sa pagduronan sa dagat kan Batalay House of Representatives, toltol siguro an pakagibo caini ta kung balasubas, bagi man sanang nagpukpok sa sadiri an contractor, he! he! he!
An icaduwang parte iyo itong aduman sa uruinotan na kulang an mga harong caya an palaman daa kan seawall dugui imbes na daraculang bato, he! he! he!
Igua man daa cotana ini nin pilote o inaapod na sheet piles, alagad harimbawang mabuksan nin lungso an lanob caini na pano nin dugui, daeng silbi an mga pilote.
*****
Sabay palan na nag-abot sa Isla Maogma pakabagyo an duwa sa tolong congresista kan isla, si Cong Yoloyo y Cong Bong kan TGP.
Ini an disbentahe kan saendang trabaho ta caipuhan sindang presente sa Gatasang Pambansa, minsan magparatinganga sana sa gilig habang gasesyon.
Kung iguang calamidad sa isla, naenot na panaltag an saendang mga kalaban na gatucaw sa puesto.
An congressman manghoholdap pa sana nin relief goods sa mga amigo, contratista o mga halangkaw na opisyal.
Mas lalong kahelak kung bako siyang kaalyado kan mga gatukaw sa puesto arog sa gobernador, bise gobernador o alcalde.
Ngonian, kung an mga tawong ini puro mo kalaban, dae ka iimbitaran sa panaltag nin tabang sa mga nadanyosan.
Bahala ka man mangilimos nin sadiri mong pangtabang, o caya mag-arog sa mga candidatong dae man sa puesto, nakisab-it na sana sa mga NGO tanganing maheling man nin tawo an saendang mga pandok, he! he! he!
*****
Ano daw daa kung an patibayon kan VIWAD iyo an pakapamugtak kan mga daraculang tubo sa transmission line?
Sayang daa an pagbakal nin metro y kung ano-ano, kung cada bagyo, mapurutol man sana an mga tubo pababa sa source.
Grabeng tios nin mga consumidor sa katatabo nin tubig sa mga bombahan….