Baguing suro-semana na ang mga bagyong gaagui sa Isla Maogma.
Pakatapos ni Marce, nagsunod si Nika. Gaturoytoy man an duwa pang masunod, si Ofel y Pepito.
Sa ngonian, an sabi kan PAGASA, tibaad sa Cagayan naman magvisita si Ofel, pero siguradong igua na naman kitang senyal numero uno sa Viernes, Noviembre 15, ta nasa Silangan nak an Virac an bagyo.
Si Pepito harayo pa man, makatipon na ini nin kusog caya sa otro semana naman ini mahapit sa isla.
Inaapodan an gabos na mamibi, siring sa ginibo ni Monsenyor Luisito, tanganing dae man kita tamaan kan duwang bagyong ini y makahawas na man an satong mga tugang sa ibong na naronot an buhay kan baha ni Kristine.
*****
Magcapirang mga ciudadano an nagreparo sa DSWD regional field office diyan sa capitolyo sa pasakit na tinatao ninda sa mga nagadanan na gahagad nin tabang sa irarom kan programang Assistance to Individuals in Crisis Situation o AICS.
Segun sa saenda, dagdag gastos an reglamento kan mga opisyal ning field office na ini na gahagad pa nin certified true copy kan death certificate minsan bitbit na ninda an original pati sarong xerox copy.
Gusto pa daang mahiling an pirma kan Local Civil Registrar sa xerox, masque nahiling na nindang an xerox lo mismo kapareho kan original.
Cotana daa, an mga taga-DSWD na mismo an magsurat sa xerox na ini faithful reproduction kan original, bako na pagsugoon pa sinda otro sa LCRO tanganing magkua kan certified xerox copy.
Dae daa ninda pigaisip na dagdag gastos ini para sa mga pobreng nagadanan, treinta pesos na pamasahe cada vuelta, mabayad pa sa certified true copy.
Harimbawang bako pang imediatamenteng miembro kan familia kan naotsan, mapaguibo ka pa nin affidavit of kinship sa abogado, dagdag naman ciento cincuenta pesos na gastos.
Puro man siguro mga nag-aradal nin colegio an mga taga-DSWD field office ta dae man sinda ikahang diyan kung elementarya sana an saendang tinapusan.
Cotana dagdagan man nin diit na pagsabot y pagkahelak an saendang pagsirve sa mga taga-Isla Maogma lalo na ta bako man ninda ining cuarta kundi imo nin publico (caibe an binayaan ni Nestor).
Dae ngani ninda pigreparo an minilyon na fondo nin TUPAD asin AKAP pigataltag nin mga politico, lalo na an mga congresista, sa sadiri nindang mga kaalyado na dae gaagui sa DSWD.
An mga empleyadong in isa DSWD Catanduanes field office dapat nang ireclamo sa 8888 o caya sa saendang amo diyan sa regional office o duman sa saendang secretary mismo.
*****
Oras na siguro para reparohon kan municipio an mga inuman sa población nin Virac.
An gustong sabihon kan nagreparo, dapat tawan na nin tig-an an mga ini kung hanggan anong oras puede magpabakal nin inumon sa mga parokyano.
Caidto, diyan sa defuntong Chicken House, pag alas dose, dae na puedeng mag-order y pag-abot nin ala una, sarado na an establisimiento.
Ngonian, iguang mga inuman sa sentro asin sa gilid-gilid nin población, lalo na sa kahalabaan kan boulevard, na iguang gapaaraga nin pabortok an mga customer.
Iba na man pati an oras, ta mapoon alas nueve, masarado alas cuatro na.
Igua na nganing nangyaring nagborongagan dahil sa babaye an mga tinedyer na bortok, mayad nganing dae man nin nagdurugo.
An magayon na maisihan, pira na daw na naagahan nin inom sa mga establisimientong ini an nakanagbo nin aksidente sa dalan, nairido o natigbak?