Nagpoon na palan an pagsumitir nin mga Certificate of Candidacy sa COMELEC.
Halangkaw an posibilidad na an mga naamay tunay na nangaipo nin voto ta an gusto maenot maheling nin mga votante sa Facebook, he! he! he!
An mga kabali sa alyansa political arog kan mga kaalyado ni Cua y Teves halos sarabay an, siring man an mga nakaroy kan grupo ni Cong Yoloyo, an pag-iribang paanos asin an vocal na gusto pa maghalangkaw an puesto.
Ta an mga ini iguang pangkurukay sa mga siwo, maski mamurhi daeng problema, ta para sa saenda an importante an pang-ultimo ora.
Sa mga madeligencia sana, ventaje na an naenot ta puede na makasolocit kan saendang pangkampanya.
Ito man na an tuyo sana makabali sa listahan nin COMELEC, makapataba na nin puso na sinda apudon kan mga nanangbuan nin consejal, bise, alcalde, o ano pa man.
Saro sanang patanid: ito tabing mga seryosong ambisyoso na ipusta an saendang tagong yaman, lumpsum pension o natipon sa garapon para sana manggana, guilomdomon na bagui man sanang sugal an eleksyon. Mas dakul tabi an nadaog kaysa nanggagana.
Caya habang amay pa, dae pa natapos an filing kan CoC, mag-isip-isip, hapoton otro an familia asin mamibi sa Kagurangnan, tanganing tama an magiging desisyon.
Harayo pa man an campanya, maagui pa an Krismas. Igua pang panahon magpasinsilyo nin maningcuenta, mananggatos, adocientos y aquinientos.
Alagad kung dae pa ngani kamundagan ni Kristo, kung an pagmati mo bilang candidato bagui ka kang limon na pigapuga nin mga votante, bawia na an tinao mong documento sa COMELEC…
*****
Afuera qui Gob Boboy Cua, saro sa mga pigaabangan kung ano an dadalaganan sa Mayo 2025 iyo si Atorni Puting Buhok, an comentarista kan Catanduanes Tonto.
Dati na ining nagtaram na kung saen mapunta an halangkaw na opisyal kan CatSU, aduman man siya maduman.
Ini daa tanganing mapatunayan niya sa tribuna na bako siyang abogadong pulpol, ta nakapasar siya sa bar bakong arog kan saiya daang kalaban na sagcod ngonian hanggan JD an okig sa pangaran, an gustong sabihon, Janggang Diploma sana, he! he! he!
Alagad posibleng magdalagan man ini bilang bise gobernador lalo na kung an hiling niya mga maluya man sana an mga candidato y an apelyido dae gapoon sa letrang “C” o “T”.
Halaton ta kung ano an direksyon kan karera sa politica kan atorning pulpol, ay sala, puti an buhok…
*****
Dae ta pa nasabotan kung ngata dae dinagos an miting kan Board of Regents kan Septiembre 26, kung saen si CHED Commissioner Ethel Agnes Valenzuela iyo na an matukaw bilang chairperson diyan mismo sa conference room kan CatSU.
Pinag-oktaba daa ini sa Oktubre 10, tapos na an filing nin CoC kan mga candidato. Entonces, dae na maheheling kan mga miembros nin BOR, itong bako pa man expired an termino, an pinakahalangkaw na opisyal sa Cesar State University.
Siguradong kabali sa mga paghohoronan kan mga ini iyo an kaso nin mandamus na sinang-at kan elegidong presidente kan University Student Council na sagcod ngonian dae pigamidbid kan administrasyon ta bako daang qualificado magcandidato y dae daang poder an alcalde nin Virac na siya pasumpaon.
Saro pa sa mga nasa agenda iyo an pagpili nin magiging OIC kan CatSU habang gahanap pa nin bag-ong presidente katukal kan pinakahalangkaw na opisyal na gusto pa maghalangkaw an puwesto.
Lima na daa an posibleng pagpilian, alagad duwa o tolo sana daa dindi an capable, cabali na an candidato kan sungaw na balbula kan rueda ni Cong Yoloyo.
Ano daw ang mangyari sa maabot na semana?