Igua na naman palan nin nakikarera ki Satanas sa Virac.
Dae na uminabot nin buhay sa ospital an arkitektong director kan VIWAD matapos na an motorsiklo caini buminangga sa bakal naEnot kudal diyan sa San Roque kan Abril 30ng maagahon.
Nakainom daa an director na makaskas an buag kan ini magkurbada, mag-overtake sa saro pang motor y magdiretso duman sa steel railing.
Dae man daa nakakabit an helmet caini na nakua ngani duman na sa ibong kan tinampo.
Sayang na buhay, sayang na servicio publico.
*****
Simple man sana cotana an solusyon sa mga aksidente nin nakainom basta magsunod an gabos.
Primero, dae na mag-inom nin alak, lalo na ta apektado caini an katoy, bulsa asin pitaka.
Icaduwa, kung iguang planong mag-inom sa luwas, magdara nin drayber na dae mainom o caya magpasundo pakatapos tanganing malibyano an pagparibod.
Icatolo, dae na mag-inom sa luwas, diyan na sana sa mismong harong mo. Kung daeng kahampang, imbitaran an kanatad. Kung habo mo, puede man su barkada mo, basta dae ka na mag-iba pagluwas kung mapapawas pa. Kung sa sadiring solar ka maboyong, hababa sana an saimong kanapan, papahidan ka pa nin maligamgam na tuwalya kan saimong mahal na agom, he! he! he!
*****
Igua palan nin calamidad diyan sa San Miguel kan Lunes.
Nagpatipon daa nin tawo si Cong Yoloyo duman sa District 3 kan panahon na antebispera para sana manaltag nin DSWD food packs, an mga kahon nin bagas, delata asin kape na normal na pinanao kung panahon nin bagyo.
Tibaad nagdeclarar na man an capitan del baryo nin state of calamity dahil sa sobrang init na dara nin El Niño sa District 3, kumpara sa kataraning na barangay, he! he! he!
Puede na sigurong magkulong an mga recipienteng familia sa saendang mga harong nin tolong aldaw tanganing dae sinda tamaan nin init in aldaw.
Gapurotong-putong an ibang tawo sa banwaan ni alcalde Jun Camano sa panaltag.
Alagad an iba daa sa naresibe, gahapot man daa kung iguang kasunod na hamon de pata, he! he! he!
*****
Bago palan pinangenotan kan TGP ni Cong. Bong Teves an panaltag nin ayuda nin DSWD sa mga estudyante sa tolong colegio sa Virac, enot na daang inimpormaran an manejamiento kan CatSU.
Alagad an hapot daa kan nanunungdan, ngata ta bako na sana sa unibersidad gibohon ta kung duman pa daa sa Plaza Rizal tibaad mangaipo pa nin permiso sa saendang mga magurang an mga estudyante.
Sa panahon ngonian, lalo na kung cuarta an paghoronan, minsan dae pang permit o alas dos nin maaaga an taltag, mapunta ta mapunta an mga benepisyaryo que iguang permiso o dae.
An gusto man sana huba kan nanunungdan iyo na makabali sa pagpitik kan photographer kataning asi Cong Bong para igua naman nin ipost sa social media, he! he! he!
Duman daa sa Plaza Rizal, aduman sinda alcalde Samuel Laynes y an alcalde nin Baras na si Jose Paolo Teves III.
*****
Iba na man palan an estilo ngonian sa pag-release nin asistencia nin gobyerno.
Duman daa sa plaza, an tres cientos noventang mga recipientes pinasumpa sa plataporma kan TGP, na iyo daa an nagsolicit kan ayuda da DSWD central office.
Siring man siguro an pinagibo sa cincuentang iskolar kan CHED sa pagtao saenda kan veinte cinco mil na asistensya.
Preparasyon na siguro ini sa maabot na eleksyon sa Mayo 2025. An gabos na maresibe nin mejoras sa candidato bako sanang papirmahon kundi pasumpaon pa an enterong familia, naka-online pa sa Facebook, he! he! he!