Natapos sana an Semana Santa, dagos nagruluwas an mga huringhuding manongod sa kung sisay an macandidato sa lokal na eleksyon sa 2025.
Segun sa mga ini, sa dati sana an magtugang sa capitolyo, dae daang mahiwas ta igua pang duwang termino si Gob Boboy.
Maguiromdoman na an pagsirbe niya bilang ama kan provincial kan 2016 hasta 2019 naputol kan ini suspendihon nin sarong taon kan Ombudsman.
Nagpoon an suspension campanya kan 2016 sa icaduwang sunod na term niya bilang gobernadora. Cotana daa sinuspinde siya sa laog sana kan terminong ini, ta dae man sigurado na siya magana pa sa eleksyon kan Mayo 2016.
Sabi kan Corte Suprema, an terminong naputol nin suspension, dae dapat bilangon na bilog na termino, caya an gobernadora nasa enot na naman na term kan pagka-ehekutibo.
Ngonian, ta si alcalde Samuel Laynes cierto nang madalagan bilang congresista laban qui Cong. Yoloyo y an parataltag nin hamon de pata, an pigasuspetsahan daang macandidatong catucal iyo si Joseph Cua Jr..
Isyu na naman ini para sa mga kalaban, ta sasabihon ninda uuboson na naman an posisyon sa politica.
Alagad pareho man daa ini an plano kan Batalay House of Representatives.
Pupurbahan ni Cong Yoloyo na manggana sa 2025 para sa icaduwang termino, an gatindog daang congresista macandidatong alcalde sa Calolbon kung saen siya namundag, y an saenda man na aqui iyo an malaban sa pagca-alcalde nin Bato.
Igua man nin osipon na si ex-Cong Cesario maentra man sa pagka-mayor nin Virac alagad baguing sala man ta nagdeclarar na man man daa si ex-mayor Posoy na babawion niya an dating puwesto.
An wara-wara kan pandemya na si dating Cong. Hector mabarik daa sa otro taon, pero malaban sa pagka-gobernador. Sa ngonian, dae pa naheheling an calag nin Manoy Hector, minsan igua pang gakurahaw kan saiyang ngaran kung nawara an kuryente.
Ini an enot pa sanang mga ispekulasyon sa paboritong istorya nin mga daeng gibo…
*****
Diyan palan sa DPWH, iguang alcaldeng contratista na daeng lisensya an naagawan nin proyecto na gakahalaga nin labing cien milyones de pesos, na cotana an ganancia puede nang pambakal nin voto sa 2025.
An nangagaw daa kan proyecto, lisensyadong contratista na parientes kan kalaban sa politica kan alcalde.
Minsan daa lampas pa sa treinta porsiyento an binawas sa bid amount, dae na bale daang break-even sana an contratista, basta an kalaban na alcalde dae makakua kan cuartang ipanartag. Maorag an depensa ni manoy, he! he! he!
*****
Gakaarano na ining DepEd, CHED, asin mga escuelahan sa ngonian na panahon?
Sabi nin mga goslab, mainit man an panahon kan sinda gaerescuela, gabatlay pa ngani sinda papunta asin paribod maski odto ta dae pa man nin traysikol, alagad daeng suspensiyon nin clase.
An dapat man sana daang gibohon iyo na magdara nin payong o kalo, asin kung maanangaang pa sa klasrum, mag-order online nin saday na rechargeable electric fan.
Dae na daa magpara-suspendi nin clase o mag-asynchronous ta kulang an namatidan kan mga estudyante, atang below average na an mga Pinoy sa enterong kinab-an sa pinakahuring Program for International Student Assessment (PISA) sa mga subject na Math, Reading and Science.
Tanganing mabawasan an pagkabontol nin satong mga kahimanwa, magpatood sa init o uran.
Iyo man an an gibohon kan mga Pilipino, ta cadaclan sato sa impiyerno mapunta. Magpuro-praktis na, he! he! he!
*****
Diyan palan daa sa DepEd division office, pigaparagawan an lagod.
Segun sa osipon, an mga ginalon na tuba na pigahalo kan BAC, TWG asin magcapirang opisyales, tundag an lagod, dae daa gaitaas, he! he! he!
An gustong sabihon, an mga pigalutong proyecto an nakinabang sana an bilang na mga masuerteng miembros kan BAC asin TWG, asin duwa o tolo pang opisyal, matagas man o mayota.
An mayor na kusinero daa nasa TWG, ta iyo an gapadpad kan carne, gulay asin maritatas na lulutoon, Treinta mil daa an bayad sa pagluto kan cada putahe pero an mabakal daang contratista dae nakasiguro kung masilam an namit, ta an kusinero iguang mga paboritong parakaon, he! he! he!
Caya daa an ganancia man sa pagluto, aduman sana sa mga invuelto, dae kabali an mga amo, he! he! he!
An mayor daang kusinero tolo na an magayon na harong y sa ngonian dae naisihan kung arin an estada kan tunay na agom, he! he! he!
Iyan man an ventaje nin dacul an tagahan, dacul man an bun-akan, he! he! he!
Awat na daa an pagluto nin mga bidding sa dapog kan BAC asin TWG, dae sanang gareclamo kan mga nacaaguing taon.
Noarin daw panamiton an mga ini nin kagamohan nin kaso sa Ombudsman?