Igua palan nin mga nag-abot na mga visita hari sa Maynilang kayganda kung sain sinda gapirmi.
Naenot daa si ex-Cong Cesar na nagsugo nin mga alalay na manartag nin tiket sa mga piling residentes, ay sala, votantes palan duman sa magkapirang barangay nin Bagamanoc.
Natural dae kabali an mga midbid na nakalista sa dati sanang ilibahan.
An mga natawan nin tiket dinuhoran daa kan ex-cong nin patos na may laog na bagas pati grocery.
Tapos na an Christmas y Valentines Day, caya an tuyo man sana kan panartag iyo na ipamati sa mga votantes na hoy, buhay pa si ex-Cong, he! he! he!
Dati nang napabareta ini na makandidato naman daang congresista kung dacul an mabali sa derby.
*****
Pacatapos nin halawig na panahon nin pasiram-siram sa luwas, nag-aparecer man daa sa isla si ex-Gob Many Cely Wong y an saiyang aqui na si Jardin Brian o JB.
Naghapit daa ini duman sa oficina nin presidente ni CatSU.
Kung ano an napaghoronan, dae ta isi ta bawal an media sa laog.
Sa inapod daa nganing presscon ni Pata, duwa sana an imbitadong local na media y sinabihan pa na magdangog sana, bawal maghapot, he! he! he!
Ano daw an natakotan na hapot na dae kayang simbagon?
Ta dae pa man nagluwas an nasabing pataratara kan presidente, dae pa kita makasabi kung ano na talaga an tuyo ni Dr. Azanza, gobernadora, congressman o presidente kan CatSU University Student Council, he! he! he!
*****
Walong bulan na sana an natatada bago magdeclarar an mga nakatokaw na politico asin an mga ambisyosong gustong magsalida sa saenda.
Si TGP Cong. Bong Teves gapagilomdom na man, nagkaralat na an karatula kan TGP na kaiba an litrato niya.
Inda kung ano an gustong sabihon kaini, election o reelection?
An dating congresista, si Manoy Hec, dae pa naheling an calag sa Isla Maogma, pati an saiyang istasyon nin radio nawara na sa ere, baguing dae nang plano.
Kung igua pang magbotwa na pinangaturogan man na magana, halaton ta sa mga masunod na semana, lalo na bago mag-Semana Santa.
Magbantay sa aeropuerto nin Virac, pag igua na nganing nagbaba sa eroplano na hanggang taringa an ngilit sabay pangabrasa, iyo na an, he! he! he!
*****
Inaapodan an mga estudyante y empleyados na dae pa nakalaog sa oficina kan presidente nin CatSU, lalo na itong dae man tuyo y gusto man sana makamarites na nahiling na ninda an cuarto kan pinakahalangkaw, ay sala, pinakapoderosong opisyal kan unibersidad.
Madari sana daa ta an gigibohon man sana ma-like o ma-comment sa mga Facebook post kan mga tawong an tabas kan dila dae naoyonan kan administrasyon, he! he! he!
Magdara sana daa tabi nin tuwalyang pamunas ta tibaad karigoson kamo, he! he! he!
*****
Ano na daw palan kung naipabakal na sa junkshop an mga bakal na tinosang diyan sa dating covered court kan CatSU?
Segun sa mga nacaisi, ginaba daa ini minsan kulang man an danyos sa atop kan panahon ni Rolly kan 2020.
Kung igua ini nin demolition permit hari sa COA o kaya sa Building Official, dae ta isi.
Kung haharion an edificio ta gigibohon na playground o parking lot an lugar, cotana daa saro-sarong tinangkas an mga tornilyo kan steel truss, tanganing puede pa ikahang sa ibang mayang na lugar, bako na pilidasohon para dae na magamit.
Sayang an catorce milyones pesos na ginastos sa pagtogdok caini…