Masdi daw ang bâhaw, ta
Baging princesang nakadulag sa
Torrengbato nyang kulungan,
Kaya dahil sa sainyang
Katalingkasan
ang gabos sa kapaributan
Ga-sarayaw sa kaugmahan.
Ata baya dang’ga ang harâhâ
Kang mga ga sarapu sainya –
Biyong ga uruktuy – kaya
Maski saen na sana nakatarapsik!
Dangoga man ang palakpak
Kang manglaen-laen na dahoon:
Magsaladatuy, magdalakula,
Magbilogon, maghalaban-un,
Magbierde, maggiyaw.
Masku su gurang na manalo
Na nakagapus sa arintitî
Bagi lugod iyo na su maestra
Kang orkestra ning mga gamgam
Na minatanyog sa kasarugan.
Salubaku, engrandeng celebrasyon –
Tunay na kafiestahan ning natura –
Na dai dapat pakialaman
Ning maski sisay man.