Igua palan nin nabotod kan Kapaskuhan duman sa Tibang, San Andres.
Naglalangoy-langoy daa an sarong bakasyonista sa dagat kan tabagon nin nin darakulang lungso sa tahaw nin dagat y dae na nakabarik sa pangpang.
Dae nang buhay kan makua ini kan mga personajes nin PCG Codon substation kan odto nin Dec. 25, 2023.
Pagkaaga na namidbidan an nalunod na iyo si Sonny Perina, 28, tubong Tiwi, Albay na residente nin Tabaco City.
*****
Hanggan ngonian, matagas man siyempre an mga payo nin mga Filipino. Bako man cotanang mga Intsik alagad dakula an pagtubod na padulagon nin paputok an kamalasan.
An mga kunsintidor mga igua nang edad na mga lalaking, lalo na pamilyero, na dae nakaisip na an pinakamagayon na paputok nasa laog nin harong.
Puede man kutana magpaputok sa luwas, alagad delicado kung an paputkan dae mo isi kung pinaputkan na man nin iba, he! he! he!
*****
Inaapodan an mga taga-BFAR, OPAg asin iba pang agencia na bisitahon an sarong lugar diyan sa may talipapa kan Bigaa.
Igua diyan nin pigatubig na tinampo na posibleng pabuhian nin mga fingerlings nin tilapia, bangus o buyod, kung dae na aaksyunan kan DPWH ta sakop pa ninda an tinampo o kaya kan VIWAD kung an tubig ha
Pirang bulan na daa ining dae nagamit nin publico, lalo na mga motorista, ta dae gahubas an tamaw.
Magayon na magamit na sana ini kan BFAR asin OPAg tanganing maipaheling kung pan-o magpadakula nin tilapia o bangus sa tamaw na hanggan bukong-bukong an rarom, he! he! he!
*****
Kulang daa an nagribot na naki-Krismas kan fecha 25 nin Deciembre, sabi kan mga residents nin Virac.
An cadaclan pan-o, aduman nakipila sa rinibong tawong gadesir na makakua nin regalong bagas hari qui Gob Boboy Cua.
Napagal na man sigurong batlay an cadaclan, lalo na ta masakit an buhay ngonian.
Mahal an bakalon ngonian. Ang sila sa saod grabe an presyo: tres cientos an turay, daog pa an bangkulis na dos cientos otsenta sana.
Nagpa-aragaw an mga bakasyonista asin macuartang ciudadano sa malasuging quinientos an kilo.
Dae kitang maginibo kundi magpasenya sa hamon, humba, cake, asin iba pang tada sa Noche Buena. Sa mga gatirios, pasensya sa sardinas….
*****
Ano an satong dapat abangan sa taon na ini?
Enot siyempre an year-end report nin CatSU. Natapos na lamang an Dec. 31, dae pang nangyari siring sa panuga nin tricycle driver na binahog nin pata.
Tibaad sa pagralaogan na nin mga estudyante ta kung katapusan nin taon, daeng mahiling. Kung iguang clase, apurado sanang magpaluwas naman nin orden sa mga maestro y maestra para sa alternative classes, he! he! he!
Icaduwa, ngonian na natapos na an provincial meet, mapoon na daa an training sa kanya-kanyang escuelahan an mga ganador bago ini sundan kan municipal training.
An problema sana, kulang daa an fondong inalocar kan junta provincial para sa mga palaro sa enterong taon.
Cotana lamang, makabakal na nin spike shoes tanganing an mga nangganang nakabitis sa turupasan matood na sa sapatos.
Kung talagang mas matimbang sa satong mga honorable an mga proyectong iguang ganancia, magsolicit na sana an mga superbisor nin sinsilyong pambakal nin lumang sapatos sa ukay-ukay, dagdagan pa nin de-dos na pako hari sa hardware para igua nang spike an sapatos, he! he! he!
Ipadagos ta ining diskusyon sa masunod…