Sagcod sa ngonian, dae masabotan kan mga nakaisi kung ano talaga an nangyari sa handaan sa sarong hotel.
Segun sa sihongan na napangistorya, igua daang welcome party para sa mga miembros nin medical mission na ginibo sa sarong hotel.
Aduman ngani daa sinda Gob Boboy Cua, Alcalde Samuel Laynes, Cong Yoloyo y duwang PBM bilang visita.
Pakatapos daa kan mga pataratara y karaonan, sinabihan daa an staff kan hotel na patoson na an mga tada, ta sa ciento cincuenta daang imbitado, sanggatos man sana an nakaabot.
Entonces, amot-amot an puedeng balonon paribod sa harong o sa cuarto nin hotel.
Caya daa kan iguang mangahang sa may kusina, itinao man daa diretso an mga patos.
An problema, paka pirang minute, hinanap na daa kan nagpahanda an mga tada, caya an sabi man kan mga waiter, kinua na.
Natural, daculang problema an nangyari ta dae na mahanap kung sisay an nagbitbit y kung saen dinara an mga tadang putahe kan kamatang-an na ito.
Ta malang paribot daa nin CCTV (bakong mga Marites) an hotel na ini, kinaagahan hiniling daa an footage kan nacaaguing banggui.
Naheling daa duman an drayber nin sarong politico na iyo palan daa an nagkua kan mga tada, binitbit pababa, dinara sa ibong na tinampo asin hinalat an nakaparadang pickup na mag-atras, bago kinahang an mga patos sa rikod.
Natural, hinapot daa kan manejamiento an politico sa nangyari y an politico nagsabi na dae man daa ito gigibohon kan saiyang drayber.
Kung ano ang nangyari pakatapos caini, dae ta na isi.
Inda sana kung taga Bagamanoc o Cabugao an drayber, ta tibaad pinasiguro nang panghanda sa piyesta, he! he! he!
Hinapot man an manedyer kan hotel kung ano an laog na mga putahe sa mga supot, alagad an saiyang simbag, dae man daang nangyaring biritbitan nin tada, he! he! he!
Dae na kita maimbestigar pa kung ano talaga ang nangyari, kung totoo ini o bako, ta mga politico an invuelto.
Bahala na kamo mag-isip kung kisay na politico an drayber.
An importante, naisihan kan publico (kabali an mga macuapo ni Nestor) na sa Isla Maogma, bako sana palan na mga proyecto an pigatabag, kundi pati tada sa handaan, he! he! he!
*****
Gaabante na palan an kaso sa Ombudsman laban sa mga invuelto sa mga proyecto sa Isla Maogma.
An mga taga-DepEd division office daa, nakakua na nin abogado sa ciudad nin Naga na iyo an masimbag sa pinadarang subpoena kan anti-graft court.
Ta de campanilya an abogado, cabong-cabong daang tres cientos mil pesos an acceptance fee caini.
Kung nag-arambagan an mga miembros nin BAC y pag-iriba sa daculang bayadan, sinda sana an nacaisi.
Sa ley, dae man nin permiso an gobyerno na iyo an mabayad sa legal fees nin mga BAC members na makasohan sa kung anong iregularidad sa pagpa-bidding.
Diit man sana an honorarium kan mga taga-BAC asin TWG, lalo na sa lebel kan local na gobyerno.
Kung tabangan ka kan contratista, mayad. Kung dae, bahala kang mangutang o mangilimos nin pambayad sa abogado o caya ika na sana an magsimbag, bahala na kung makulong.
Diyan daa sa DPWH, naglakaw na man an kaso laban daa qui DE Cagomoc. Itong ki dating DE Joven y Director Eduarte, pinasimbag na kan Civil Service Commission an duwa sa irineklamong orden na ilipat sa regional office an sarong section chief na soboot kalaban kan campo ni Cong Yoloyo.
Sa mga invueltong opisyal, bakong problema an pambayad sa abogado ta mga awat na ini sa servicio, nakaamot na man nin sinsilyo sa sagad, tibaad sa kaban pa, he! he! he!
*****
Baguing dae na sasalidahan si defunto Consejal Don Robert Maullon sa Sangguniang Bayan kan Virac.
Tolo na sana daa an pigapilian y an saro ngani firmado na daa an papeles, alagad igua pang mga nagpadangog kan saendang mga opinyon sa bakanteng puesto.
Halaton na ang masunod..