Dapat na makisumaro an gabos sa pagselebrar kan ikapitong Abaca Festival sa Isla Maogma.
Bilang numero unong lugar na gaproducir nin bandala, tama man na tawan nin magcacanigong rason an isla na omawon asin caogmahan an bagay na ini, lalo na an sakripisyo kan mga parahagot.
Base sa programa, an mga event na iguang camogtacan para sa paratanom nin abaca, parahagot pati na mga abaca processors iyo an ABACANOBASYON kan DOST, Techno-Investment Forum, Search for Outstanding Abaca Farm Family, Abaca Forum asin an Abaca Timbangan.
An ibang mga actividad cadaclan diit o dae man nin itataong mad-ayad sa mga invuelto sa abaca industry, afuera na sana kung mahiling ka kan mga exhibit y palabas.
Dae man daang interes an parahagot sa travel expo, ta kulang ngani an ganancia ngonian dahil sa hababang presyo nin bandala.
Sabi ngani nin sarong sihongan na observador, tibaad daa mas dakul pa an pakinabang kan mga choreographer sa street dance, make-up artist, paradecorar nin float y mga kagsadiri nin sound system kaysa mga parahagot.
Saro pa, hagad man daa kan mga alcalde na pagsaroon na sana an Abaca Festival pati na an mga events sa Catandungan Festival sa Oktubre ta nanganaan sindang botbot sa bolsa nin panggastos kan tawong gapartisipar.
Igua man nin rason, makatipid na sa gastos ta imbes na duwa, saro na sana an hahanapan nin fondo. Mas dakul pa an bakasyonista kung Mayo ta panahon nin piyesta.
Ang selebrasyon kan pagkamundag kan Catanduanes bilang independienteng provincia puede nang gibohon na solemne y sa laog sana nin duwang aldaw, sa bisperas y kaaldawan.
Ano daw?
*****
Kung dae mangyari an suhestiyon na gibohon na saro sana an festival, dagdagan ta na sana nin saro pa.
Sa mga masunod na bulan, magayon na paghoronan an pagcacaigua nin Ampaw Festival.
Kabali dindi an mga paragibo nin ampaw na pigakaon, pati mga agencia de gobyerno y contratista nin proyectong ampaw, y an fondong gagamiton sa mga events itatao kan congresista, gobernadora y mga alcalde, he! he! he!
Kung an mga para-ampaw duman sa kusina mapahiling kung pano pigagibo an pangmeryenda, sa tinampo naman an mga taga-DPWH, PEO y NIA y an mga contestant sa pinaka-ampaw na baldosa, he! he! he!
Ang tinampong pinakadakul an lubak anom na bulan matapos an pagbuhos kang kongkreto iyo an gana, he! he! he!
Saro man sa basehan iyo kung pirang porsiyento an nababawas sa fondo kan proyecto dahelan sa kupit asin komisyon.
Sa ngonian, an standard daang mga deduction iyo ini: dies y siete porsiyento para sa congresista, cinco porsiyento para sa quarry kan baybay asin graba, cinco porsiyento sa buy-out kan mga kalaban na bidder, tres porciento sa mapirmang mga opisyal kan DPWH, y dies porsiyentong ganancia kan contratista, suma total cuarenta porsiyento.
Kung mas mahibog an pakakudap, mas ampaw an patrabaho…
*****
Inabotan na palan nin noticia an regional director nin DPWH hari sa Civil Service Commission dahil sa dae nadagos na reassignment nin amo sa quality control kan agencia sa Catanduanes.
An gustong sabihon, an apelar kan apektadong empleyado inaksyonan na kan CSC y puedeng magcaigua nin desisyon ini sa mga maabot na bulan.
Maguiromdoman na saro sa duwang congresista nin Bato an naghagad sa director kan DPWH na ibaryo sa regional office an section chief sa Catanduanes dahil sa pagreparo caini sa ampaw na patinampo sa Capilihan, Virac, pati na an ampaw man na seawall sa Batalay.
Alagad, nagreklamo an opisyal sa Civil Service laban qui director pati na an OIC-district engineer na nasalang akoon an puestong binayaan kan pinalayas na dating DE.
Iyo ini an masakit sa mga parapanubod sa poderosong politico. Pag nakalun-og sa compromiso, bahala na maglangoy nin kanya-kanya, ringaw na an kailiba, pwe!