Pasensya an mga votante kung medyo nagriwoy sinda sa pakalag ni atorni Puting Buhok na iguang malansar nin recall petition laban qui Congressman Yoloyo.
Sabi ngani kan mga tahodan na abogado, dae kabali sa recall an mga congresista, gatocaw man o gatindog.
An puede sanang i-recall iyo an gobernadora, bise gobernador, mga bocal, alcalde, bise alcalde, consejal, capitan y mga kagawad sa barangay afuera kan mga miembros nin SK.
An mga miembro nin Kongreso arog ni Cong. Yoloyo y Cong. Bong, natural dae cabali an icatolong congresista, puede sanang mahari sa puesto kung papalayason mismo kan Kongreso dahelan sa dain-datang pag-uugali o caya masentensyahan nin removal from office kan Ombudsman o Sandiganbayan.
Sa Kongreso, masakit magpalayas nin kairibahan, lalo na ta pararehas man sana ining mga nakihabhab sa fondo nin publico (caibahan an nahubon ni Nestor).
Mas dacul pa an mga congresistang gustong palayason kan Ombudsman o Sandiganbayan alagad caipuhan maging pinal an sentensya o makaabot sa Corte Supreme bago pa mag-aksyon an Kongreso.
Tapos na lamang an termino, baad dae pa nakadecidir an Corte.
Caya dapat saboton kan gabos na votante, lalo na itong mga nabuyo magpili sa nacatocaw, na iguang forever sa mga congresista alagad tolong taon sana, he! he! he!
Minsan kasohan mo ini nin panghabon sa cuarta ni Juan dela Cruz o pagkino sa mga joven pang mga daraga, masakit na bungkalon an lubot ninda sa tocawan sa Kongreso.
Saboton tabi na an saro sa nakakahang sa Saligang Batas ng Pilipinas para sa mga makandidatong presidente, bise presidente, senador, congressman y mga local na opisyal, iyo na batid sinda magbasa y magsurat.
Dae man nakakahang duman na an tinaposan mo elementarya, hayskul o caya ika dapat maging ingeniero, abogado, negociante o board topnotcher.
An importante iguang cuartang pambubod sa mga gutom na votante.
Saro pa, dae man nakasurat sa Constitution na an saimong mahal na agom dapat iguang inadalan, pino an hiwas, bakong sehongan, magayon y bakong poderoso, he! he! he!
Mas pabor siempre kung iguang sadiring imo, madiskarte y iguang koneksyon, tanganing dae na mangaipo nin chief of staff an agom, he! he! he!
*****
Talagang alisto an mga taga-Bato.
Segun sa mga chismoso sa SIV, apat o lima nang taga-Virac an sinipa sa saendang puesto diyan sa DPWH magpoon na initaas an bandera sa Batalay.
Naenot si DE Balmadrid, sinundan kan mga amo sa BAC, planning, maintenance asin iba pa.
Caya ngani daa hinari an fondo kan cadaclan na mga proyecto ta mabagal daa magpa-bidding an BAC, bako na dae nanggana an mga contratista nin Batalay sa mga bidding.
Kan nacaaguing semana, sinipa naman si Assistant DE Noland Guerrero matapos daang magsayuma ining pirmahan an mga suspension order sa mga proyecto kan ERR Construction kan panahon pa ni DE Balmadrid.
Kung ngata dae ini pinarosnos sa sinipang DE kan panahon, dae man nin sinabi an mga Marites.
Pila pa daw an mga taga-Bato o Rinconada na puedeng isalugar sa mga posisyon sa DPWH kan gatindog na congressman?
*****
Pigacelebrar ngonian an National Women’s Month.
Caya magheling an mga babayi pati na an mga agom ninda sa Facebook page kan provincia y agencia nacional. Tibaan iguang libre o discounted na servicio sa ospital, clinic o oficina para sa mga babayi.
Puede man regalohan kan mga masunurin an saendang mga kaubay nin libreng pasyar sa parlor, magcabangang aldaw man lamang nin pagayon nin pandoc, palinig nin bitis y kamot, tapos marinas na pagcaon sa boulevard.
Kung iisipon, an mga babayi an pinakapoderoso sa gabos, daog an lalaki. Gasunod sana sa agom ta iyo an hurit kan Biblia.
Kung gusto niyo nin pruweba, maghapot-hapot sa DPWH diyan sa San Isidro Village, he! he! he!