Nagsurvey palan an RP-Mission and Development Foundation, Inc. (RPMD) kan performance nin gabos na representantes nin distrito sa Congreso.
Segun sa survey, nangenotan sa Bicol si Albay 2nd District Rep. Joey Salceda na may rating na 90%, kasunod sinda Cong. Edcel Lagman (Albay, 1st District) and Cong. LRay Villafuerte (Camarines Sur, 2nd District) na parehong 88% an grado.
An mga nagsurunod iyo sinda Rep. Tsuyoshi Horibata (Camarines Sur, 1st District) y Rep. Marie Bernadette Escudero (Sorsogon 1st District) na parehong may 86%.
Ikaapat sinda Rep. Fernando Cabrero (Albay, 3rd District) and Olga Kho (Masbate, 2nd District) na may marking 84%.
Nasa ikalimang puesto sinda Rep. Arnie Fuentebella (Camarines Sur, 4th District) asin Ricardo Kho (Masbate, 1st District) na parehong 80%.
Sabi kang RPMD, an rating asin ranking kan mga congresista base sa pagheling kan saendang mga constituentes sa saendang pagrepresentar sa Congreso, sa legislation y servicio sa cada distrito.
Ngonian, dae cabali dindi an mga partylist congressmen siring qui Cong. Bong Teves kundi an mga regular na representante sana arog qui Cong. Yoloyo Rodriguez.
Y sa pakasabot ko, an top 10 sana sa cada rehiyon iyo an binali sa listahan kan RPMD.
An gustong sabihon, hababa pa sa otsenta porciento an grado kan satong solamenteng congresista.
An hapot daa ni ex-future congressman Atorni Puting Buhok, haen na an congressman na binoto kan mga taga-islang parapabakal nin boto?
Sabi kan mga taga-Bato Alisto, saboton ngona an representante nin Batalay na gaadal pa man kung pano maging congresista.
Dae na bale daang magparnganga ngona siya sa mga sesyon y committee hearing basta iguang nanud-an y iguang madadarang mejoras sa Isla Maogma, he! he! he!
*****
Kan Deciembre 31, napano nin motorcycle y awto an parkingan sa saod nin Virac.
An mga bakong Intsik, nag-arapurang pamakal nin mga bilog na prutas na soboot madara nin suerte sa pag-abot nin Bag-ong Taon.
Kung kinaraon lamang gabos an mga prutas na ini, dae kita nacaisi. Kung pinalapa sana, sayang an cuartang ung sakit makua.
Cotana, an selebrasyon sa Dec. 31 y primerong aldaw nin taon gibohon sanang simple, ta kung an gabos, lalo na an mga igua nang edad, papanoon an tindos nin alak y pulutan na carne, ciento porcientong an masunod na ilaog sa kimot bolong sa hayblad asin rayuma.
*****
Iguang mga naghorop-horop kung ano an dapat na New Year’s resolution kan satong mga lideres sa Isla Maogma,
Segun sa saro, magayon daa cotana na si Cong Yoloyo magbisita sa isla cada bulan pero solo sana buda iguang bitbit na caja de hierro, he! he! he!
Sabi man kan taga-Capitolyo, tibaad lamang daa nagdesisyon na si Gob Boboy ta dae na puntahan an gabos na mga gadan, kasal, pasumpa, bertdey asin iba pang funcion, tanganing an saiyang duwang bulan na agok-ok mawara na man, he! he! he!
Para qui Bise Gob Bos Te, dae sana daa siya magbag-o tanganing sa maabot na panahon, siya na man an magin gobernador.
*****
Kung harimbawang makaagui kamo diyan sa Capilihan sa Virac, papuntang Mislagan, dacul kamong maaguihan sa tinampo na mga baldosang iguang mga batak y markado nin “RR.”
Segun sa mga taga-DPWH na iyo an nagpacontrata kan proyecto, bako man daa ining initial nin sarong contractor na politico na gakaagid an gamit na mga letra.
Bako man daa ining Red Ribbon o Rules and Regulations, kundi Road Reblocking.
Sabi kan sarong chismoso, halos sanggatos daang bloke nin konkreto an iguang mga halabang mga batak, senyal na bakong toltol an halo kan semento.
An desisyon daa kan project engineer, segun sa osipon, iyo na pabakbakon sa contratistang RR an mga depektibong mga baldosa y buhusan otro.
Sabi pa ngani, an gusto daa kan contractor, kubrahon na entero an 100 percent kan contrata minsan dae pa napaayos an mga baratak na tinampo.