Ginatos y posibleng rinibong tawo an naglugdog sa mga población kan Kapaskuhan, bako sana para maki-Krismas kundi makanamit man nin masiram-siram.
Nanarian an cadaclan, lalo na ta iyo ini an primerong Krismas na dae na masyadong kaso nin COVID.
Pirang aldaw bago pa an Dec. 25, pirmi nang pano nin mga familia an Jollibee y McDo para makakaon man an saendang mga aqui nin fastfood na nahiling sana ninda sa TV.
Kan kaaldawan nin Pagkamundag kan Niño Hesus, halaba an pila sa mga residencias nin politico, lalo na sa Capilihan.
Daeng daang pila duman sa Batalay y diyan sa oficina sa San Roque, ta aduman sa Maynilang kayganda nagselebrar nin Krismas an congresista.
Inda kung nanartag man nin pinatos na bagas an icaduwang congressman kan Isla Maogma.
Su dating congressman natural dae na man nagpaheling ta naubusan na nin panartag.
Su sarong ex-future congressman dae ta isi kung sinsilyo o muda an pinanartag, he! he! he!
Alagad cierto kita na an masunod na macandidatong congressman iguang pinanao sa saiyang mga constituentes.
*****
Tipid an gabod sa corriente ngonian na maripot an panahon.
Dae munang aircon, minsan ngani dae pa mapaandar nin electric fan, caya hababa an konsumo sa metro.
Kulang man an maviaje paluwas nin isla, ta dae na caipuhan magpunta sa Tagaytay o sa Baguio para magparipot, lalo na ta mahal an bayad sa eroplano y masakit magsakay sa lantsa por sobre sa macusog na dagat.
Caya an cadaclan na oras nin aldaw, naubos kan mga ciudadano sa higdaan, kung bakong nanguromon, gapainit sa saiyang kaubay, he! he! he!
Dae na maghapot kung ngata pag-abot nin Septyembre 2023, dacul an imundag na aqui, kasal man an naggibo o dae, he! he! he!
*****
Nag-overtime palan an mga empleyado sa magcapirang mga oficina sa mga LGU kan nacaaguing semana.
Bako man para sa enterong publico (cabale an mga nahubon ni Nestor) kundi para sa mga servicio civil.
Matapos na pano daa an taon y caipuhan na maaprobaran y maitao na an Service Recognition Incentive (SRI) na veinte mil pesos para sa gabos na permanenting opisyal y empleyado nin gobyerno.
An lugi iyo an mga local na gobyernong kulang an fondo, caya an marecibe ninda proporsyon, siring kan mga nanggana sa derby sa Virac na kulang an nakuang premyo hari sa mga promotor, he! he! he!
An pangapodan nin sarong parabulang, magcaigua nin ordinansa na kung garantisado an premyong un milyon, ideposito na an cuarta sa tesoreria sarong aldaw bago gibohon an derby.
Duru-daculang cuarta ini, caya an makapanuga sana su hararom an bolsa, he! he! he!
*****
Herac man kan satong mga tugang na parasira.
Daeng maginibo kundi maglawod para makakua nin imo o pagcaon kan saendang mga familia.
An hapot ngonian, ano man daw an maginibo nin gobyerno kung sinda macanagbo nin aberya sa lawod?
Sa ngonian, dae lamang. Hanggan sana sa magastos na aerial search an nahaman, dae ngani daang naheling na bangka o tawong galataw-lataw sa dagat sa laog nin duwang oras na palayog kan helicopter.
Dae man puedeng maglawod an Coast Guard sa isla lalo na ta kulang an gamit caini y an mga personaje ngani kulang man sa actual na training sa dagat.
An saendang mga equipaje sa ngonian saday na speed boat y rubber boat na dae man puede maglawod.
Kung caipuhan nin firetruck sa cada municipio, mas importanteng matawan nin duro-daculang sasakyan an Coast Guard sa isla tanganing maka-acuder sa oras nin pangangaipo kan satong mga parabanwit sa lawod.
Magayon cotana na maguibohan nin paagui ni Cong. Bong Teves kan TGP Partylist na kumbinsihon an PCG headquarters na sarong barko an permanenting idara sa Isla Maogma.
Tutal bako man siyang gaparnganga sa Congreso, puede man niyang hapoton kung ano na nangyari duman sa planning PCG training base sa isla kan Panay…