Naribong an katawohan sa Isla Maogma sa dae gaturupong bareta sa namogtakan ni Paeng kan Sabadong maaaga.
Sa alas onseng report kan PAGASA, an bagyo daa matama sa Rapu-Rapu, Albay kaya an mga mahilig mag-igtok nagbukas na nin Ginebra o Emperador.
Sa siring man na oras, sabi kan mga weather forecaster na mga Hapon, adyan na daa sa tampad nin isla si Paeng y matama sa Baras bago magbalda sa Calolbon.
Pasado ala-una nin maaga, biglang nagluya an hangin asin uran, nag-anangaang an panahon. An mga nagluwas kan oras na ito, nahiling an kalangitan na iguang puting panganudon, iguang kikilat sa itaas.
Iyo na palan ito an sentro ni Paeng.
Dae na siguro nahanap kan PAGASA kung haeng si Paeng, kaya naatraso an pagluwas kan saendang update sa bagyo nin halos treinta minutos.
An sabi ninda, nagtama si Paeng sa bandang Igang, nanggilidan sa isla papuntang Calolbon.
An mga Amerikanong forecaster man, adyan daa sa may Antipolo, Virac nagtama an bagyo bago nagdiretro sa kahadean ni Nonong.
Dae ta man puedeng basolon an mga ini kung bakong parepareho an tantiya kung haen si Paeng o kung mangain ini.
Sabi ngani kan mga eksperto, dae man nin naheling na mata an bagyo y masyadong dakula an parting tahaw kaini.
Masuerte pa man an Isla Maogma ta dae ini naging typhoon o super typhoon habang paharani. Ta kung iyo, bako sanang kabatagan o katapayasan an mitumba. Pasalamat kita sa mga namibi asin nagrosaryo.
An importante, bago magdasal para isalbar an isla sa mga masunod pang bagyo, siguruhon ngonang nakahanda na an harong, pagkaon, flashlight asin iba pa.
*****
Pakatapos kan ulat ni Alcalde Samuel, Gob Boboy y Cong Yoloyo, ma-report man daa si Atorni Puting Buhok sa mga nangyari sa nakaaguing sanggatos na aldaw.
Sa ngonian daa, segun sa mga chismoso, an nakalista pa sana an mga soboot naginibohan kan saiyang kalaban kan nacaaguing eleksyon.
Kabali daa duman sa mga nahaman an pagpalayas sa district engineer kan DPWH, pagbalasa sa mga amo, pag-layoff kan mga awat nang casual sa DOLE asin DPWH, pakialam sa mga proyecto kan mga ahensya y an panaltag nin duwang pidasong pandesal sa mga evacuees ni Paeng.
Ini mga osipon sana, ta dae pa nagluwas an listahan na papel.
Kung igua man siyang listahan sa mga soboot naginibohan kan ibang mga nakatukaw na pulitiko sa Isla Maogma, halaton ta sana.
*****
Nagrekomendar na palan an PDRRMC na ideclarar an State of Calamity sa Isla Maogma dahil qui Paeng.
Dae man nin problema kung gibohon ini ta an Albay ngani, na dae man tinamaan direkta, enot nang nagdeclarar nin calamidad.
Ini pigagibo tanganing makapagpaluwas nin fondo an mga local na gobyerno para sa pagbakal nin relief goods na italtag sa mga nangaipo, lalo na itong paraoma asin parasira na nadanyosan ni Paeng.
Saro man sa rason iyo an paghingayad kan mga naapektuhan na imprastraktura arog kan mga tinampo o tulay.
Alagad sa pagheling kan cadaclan, kulang man an nauyag na mga tinampo y dae man mangaipo nin daculang fondo.
Kaya an pakimaherak sa isip kan mga ini, limitaran sana man an pagcuenta kan mga danyos perwisyos ta tibaad mas dacul pa an makadalagan sa bulsa kan mga contratista, supplier y mga pulitiko kaysa nataltag na bagas, sardinas, kape y noodles sa mga pobreng familia.
*****
Su mga dae pa nakapamasyar sa mga sementeryo, igua pa kamong sarong taon o tres cientos sisenta y cincong aldaw para visitahon an saendong mga naotsan na mahal sa buhay.
Lugod an kaaldawan nin mga kalag o Defuntorum magpaguiromdom sa gabos na an pinakamarinas na panahon para visitahon an satong mga mahal sa buhay kung sinda gahangos pa….