Ngonian na haman na an bag-ong edificio ni defuntong Poroy Araojo diyan sa Kawit, puede na maglipat an congressional district office ni Representante Yoloyo.
Harayo an harong niya sa Batalay, napaributan pa nin halangkaw na kudal, caya dae maheling an mga ogpok na votanteng gahagad nin tabang. Atang bihira man magparibod an congresista, an icaduwa asin icatolong congresista sa isla.
Medyo durudakula an kaipuhan na espasyo ni Cong Yoloyo ta tibaad gabos na veinte cinco o labi pang mga casual na pinalaog sa DPWH tibaad diyan na sana ipa-report ta nauruyag daa an kutis duman sa bukid kaibahan an mga caminero, he! he! he!
Kung mangyari pa ngani, diyan na man mag-oficina an district engineer nin DPWH tanganing dae na siya pagparahanapon y dae masahotan na kahuron an mga parabosong contratista, lalo na itong daracula an tindos, he! he! he!
Madagdag pa ngani daa nin traffic section na compuesto nin mga alisto mag-isyu nin tiket. Ini daa tanganing maging maayos an pagsingil sa mga contratistang habo magbayad nin parking fee. Ta bako man na mga vehiculo, karbaw o kabayo an pigagarahe sa gilid kan national highway, hapoton niyo na sana tabi an sisay man ingeniero sa DPWH kung para sa ano an pigasingil kan ikaapat na congresista nin Isla Maogma.
*****
Nagviaje palan an sobra sa cincuentang mga opisyales y empleyado nin capitolyo, kabali na si Bise Gob Bos Te y magcapirang mga bocal, duman sa Sorsogon para hamanon an saendang Executive-Legislative Agenda (ELA).
Natural, dakula an gastos kan publico (kabali na an mga binayaan ni Nestor) para sa pag-arquila kan venue sa resort, pagcaon asin viaje. Labi daang sais cientos mil pesos an ginastos kan tesoreria para sana mahaman an ELA.
Sa Virac, an mga opisyales man nagdecidir na duman na sana sa E-Crown Hotel an saendang miting para makabawas sa gastos.
Segun sa mga chismoso, an pagviaje sa luwas kan Isla Maogma para sa ELA ginibo daa tanganing matipon an satong mga madunong na servicio sibil y dae magharari hanggang dae matapos an documento.
Ta kung sige sana daa an pararibod kun odto, lalo na sa parte kan mga elegidong opisyal, magcapira sana daang mga department heads an natada para magtrabaho.
Kung siring, sa otro siguro, maghagad nin tabang an mga LGU sa Campo Camacho o caya sa pinakaharaning campo kan military para gibohon na sikyu sa puertahan kan venue tanganing dae makaluwas an mga Dayanara Torres.
Tanganing mas sigurado, magbakal man nin dacul na cadena o posas para dae na makalitik an mga dulag-dulag na opisyal…
*****
Ni saro sa mga rinibong parataya sa lotto sa Isla Maogma an nakabali sa cuatro cientos treinta y tress na soboot tuminama sa 6/55 jackpot prize na P236,091,188.40.
An mga dimalas na parataya dae nagpili kan mga guminanang numero: 9, 18, 27, 36, 45, 54.
Kung pano nangyaring labing cuatro cientos an nagpili kan kumbinasyon na ini, dae ta maisihan.
Posible man na tinawan sinda nin tip, na an tayaan sana itong mga numerong puedeng i-divide ning nine. Kung siring an nangyari, ciertong luto an palotto kan PCSO.
Posible man na an manejamiento kan lotto, grabe na an pagkaherac sa mga paratayang dae gagana caya an piniling winning combination iyo itong dacul an nakataya.
Magiging kabaliktadan ini kan jueteng, kung saen an mga revisador an pipilion na manggagana iyo itong iguang pinakadiit na taya o kung sisay an paboran nindang manggana.
Para sa mga adik sa lotto, dae na kitang maginibo kundi magtaya sana oro-aldaw, masque daculang kabawasan sa gastoson sa pagkaon an bayad sa duwa o tolong tiket sa lotto.
Noarin man daw kita babalihon kan PCSO sa mga manggagana sa lotto?
Kung titiponon an taya sa lotto suro-semana na quinientos cada sa laog nin veinte anyos, maabot na ining cabangang milyon, puede na pambakal nin limang traysikel….