ang kagmasuso
sarong magayon na pungko
na korteng birhen na suso
na naabot sana ning mata ko
poon kang saday pa ako
pirmi ko na siyang piga abot
lalo na kung purisaw ang puso
imahen siya ning maboot na ina
na kinapoy sa mga gibong-ina
kaya nanok sa pagkaturog
kang mapadai si nanay
lalo ko siyang naging paalawan
kung piga abot ako ning kapungawan
maheling ko sana siya
minadulot ning hararum na ugma
ta nakabuhay sa magayon na pagmate
ning ina-sa-aking pagkamootan
sarong aga, sobra akong nabigla
kang maheling ko ang pobreng kamugtakan
kang magayon kong pungko
tinusok ning mga taklaon na bakal
ang mismong utong kang birhen
yatâ dai lamang ning nag sanggâ
sa daing haros na pagbastos sainya?
ah! modernong kinaban
pila pang inosenteng kagayonan
ang saimong rurupigan
sa ngaran ning kauswagan!