ISIP-ISIPON TA | qui Tang Tacio:

Pang-Ms. Earth an hapot sa mga congresista

Nasala daa si Atorni Puting Buhok na magbali sa Candidate’s Forum duman sa Virac kan Viernes, Abril 29.

Segun sa saiya, dae man daa siya galaom na an mga hapot daa para sa mga candidato ning Miss Earth, he! he! he!

Bagui daang anas propesor sa CatSU an nagtao kan mga hapot na masakit nganing i-translate sa Bicol, masque pa sa Tagalog.

An iba ngani daang candidato, nagkuhap-kuhap nin isip kung ano an isimbag sa halawig na hapot sa lengguaheng Ingles manongod sa climate change adaptation, biodiversity, tidal energy, economic resilience of coastal communities, etcetera, etcetera.

An saro daang candidato sa pagca-congresista, pakadangog kan hapot, dagos daang hiling sa cellphone niya ta igua paran nin coach sa audience, ga-call-a-friend, he! he! he!

Dae na lugod natapos kasimbaga an halawig na hapot sa laog nin sarong minutong tinao sa cada saro.

Cotana daa, nahapot man an daa an mga isyu arog kan e-sabong o online sabong na ngonian dacul na an naadik y nagkaororot sa pataya-taya.

Sa otro siguro, dae na pagpataramon kan saendang mga plataporma an mga candidato y diretso na sa harapotan.

Hagadan an mga ini nin tigsarong hapot para sa cada kalaban ninda y tawan man nin duwang semana para makapag-contribuir an mga ciudadano bako sana sa social media kundi sa dropbox.

Sabi ngani ni Atorni Puting Buhok, dae na maghapot nin mga bagay na isi na an isimbag kan candidato, lalo na kung ini mabobowa na sana kaysa mauyag sa publico (cabali an macuapo ni Nestor).

*****

Sige na an burobodan nin bahog sa mga siwong votante.

Iguang balde, sabon na bareta y powder, pancit canton, shampoo, bolong sa kulog nin payo y bitamina, veinte pesos, cincuenta pesos, discount card sa doctor, membership card sa partylist, asin iba pa.

Iyo na ini an eleksyon ngonian, an dae manartag nin maski kung ano na sana, lugi sa bilangan. Kung bakong kapurit, harayo sa mga iguang sinabwag.

Dae na man nin madakop sa mga nanartag, ta an mga mismong madakop gaako man kan bitamina, he! he! he!

An masakit sana sa panahon na ini, dae na makasiguro an candidato na cierto nang siya an bobotohan. Caya ngani sabi kan mga nanartag, sige an halangkaw kan inaapod na “mortality rate” sa panartag.

An gustong sabihon, kung para sa veinte mil na votante an itinartag mo, cinco mil sana an nakabarik na voto, nagsarumsom an cabanga.

Kung sabagay, an candidato man sana an nalugi, bako an constituentes.

An solamente sanang mga candidato na dae nalugi minsan manartag, an mga Cua ta pakatapos na sayod kan eleksyon, malugdog an mga votanteng nagpabakal nin voto y mamakal man nin paninda sa VTC, Center Mall y ACC, makarga nin gasolina sa Powerzone y masakay sa RSL bus asin ferry, he! he! he!

An mga candidatong daeng negocio, nunca makabawi kung daog. Kung gana man, tolong taon nin panghagad nin proyecto asin patago sa mga ga-solicit, he! he! he!

*****

Hilingon ta daw kung sisay an magana sa Lunes.

Sa pagka-presidente, lamang si BBM sa survey pero lamang sa tawo si Leni, lalo na kung an mayoriya kan mga joven y babayeng votante saiya.

Sa pagka-bise presidente, si Sara an tibaad makaluwas ta sisigurohon kan saiyang ama.

Sa 64 na gustong maging senador, an dapat cotanang makaluwas sinda Teddy Baguilat, Carl Balita, Neri Colmenares, Leila de Lima, Chel Diokno, Chiz Escudero, Dick Gordon, Risa Hontiveros, Alex Lacson, Minguita Padilla, Antonio Trillanes, y Joel Villanueva.

Alagad, baguing makalaog na naman an magtugang na mahabas, mga artista y TV personality, mga igua nang tugang o ina sa Senado, asin mga dangag na abogado.

Sa partylist, saro sana tabi an iboto ta tibaad dose man an saendong pillion. Mas magayon kung TGP ta iyo sana an partylist na taga-Isla Maogma an congresista.

Sa gobernador y bise gobernador, dae na kita mahanap ta igua na daang gana.

Sa pagka-PBM sa West district, an mayor na caipuhan an solamentang abogado, si Atty. Fred Gianan, ta nagretiro na an three-termer na graduado sa law, si PBM Arnel Turado. Magayon na makalaog sinda Doc Zafe, Sonny Francisco, Pao Araojo y Jan Alberto.

Sa East district, sigurado na si PBM Obet y PBM Edwin. An mga posibleng makaibahan ninda si Boy Balidoy, Gil Templonuevo, Lito Teves y Dean Vergara.

Sa pagka-congresista, malamangan daa ni ex-mayor Yoloyo si Cong Hector sa San Andres y Caramoran segun sa survey. Alagad baguing masakit man ini mangyari, kakamangon kan magtugang na Cua na makaluwas an incumbent.

Diyan man sa Virac, dacula an posibilidad na makavuelta na sa municipio si dating alcalde Sammy Laynes, lalo na ta kaibahan niya ang Bagong Timpla.

Lamang man siyempre si Bise Mayor Arlynn, ta an ikataong pambubod kan kalaban, daog nin tolong taon na libreng konsultasyon sa salud.

Sa mga candidatong consejal, tolo an incumbent: an solterong serbidor na si Pao Sales, an nakagamot na sa sanggunian na si Olarte y an duwang taon na nawarang si Toy Gianan.

Posibleng madagdagan sinda kan mga minasunod: Alip Abundo (an aki bako an ama), Boboy Albaniel, Kap Thon, Nel Asanza, Bani Balmadrid, Vir Candelaria, Hazel Isidoro, Don Robert Maullon, Toto Mendoza, y Ayi Molina. Kung sisay an matakdag, pasensiya.

Sa ibang banwa, cierto na an kapangganahan ninda Mayor Johnny kan Bato, Mayor Paolo nin Baras, Mayor At-At sa Gigmoto, Mayor Bong kan Viga, Bise Mayor Nonong sa Calolbon, Mayor Glenda sa Caramoran,

Medyo masakit pa magpili sa Pandan, Bagamanoc y San Miguel, ta durukutan an laban kan mga candidato.

Leave a Reply

This site uses Akismet to reduce spam. Learn how your comment data is processed.

%d bloggers like this: