Segun sa mga nakaisi, bako sanang sa corriente o presyo nin krudo y gasoline mamati an efecto kan giyera ni Putin sa Ukraine.
An pamasahe sa eroplano y sa mga lantsa nin RSL nin mga Cua, Silangan ni Tariman, asin iba pang barkong iguang regular na viaje sa isla, siguradong maitaas man, lalo na kung magsakat sa sanggatos an presyo nin krudo.
Malangkaw man an presyo nin mga gulayon asin ibang pagcaon na hari sa Maynilang kayganda, ta maitaas man an gastos kan mga trucking companies sa pagdara kan mga pagcaon na ini sa Isla Maogma.
Saro pa, adyan man an posibilidad na temporaryong magsuspinde nin mga patrabaho an mga contratista, kabali na an mga politico y mga alalay ninda, ta an madakul an gastos ninda sa krudo. An mga ini, lalo na itong nakatao na nin advance, maagrangay kung magdoble an saendang pigabakal na krudo para sa paghakot nin graba y baybay pati an pagbungkal nin daga.
Resulta, mawaran nin trabaho an saendang mga tawohan, nganga man an saendang mga familia.
Caya kung ako saendo, magtipid-tipid na ngona, bawas-bawasan an bakal nin dae man caipuhan, dae na ngona magparahabhab y igtok, tanganing igua pang tada sa bolsa para sa oro-aldaw na pambahog sa familia.
*****
Siyam na aldaw na sana pormal nang mapoon an campanya sa Isla Maogma.
Pero an satong mga candidato, awat nang lakaw-lakaw sa banwa, sa mga harayong barangay, orawang daeng mareparo ta dae pa man campanya, he! he! he!
Dae man problema siguro kung magastos na an lakaw na ini, lalo na kung biliyo an lakaw, iribahan an mga nasa linyada.
Sa sobra ngani daang kairiba na mga alalay, lalo na kan mga bida arog sa Bagong Timpla, dae na daa masabotan kan mga malabog an malsok kung sisay an candidato, he! he! he!
Segun sa mga nacaisi, milyones na an gastos kan mga ini, lalo na kung bibilangon mo pa an mga cuartang idinuhor sa mga nangangaipo bilang asistensya.
Alagad kung gusto mo talagang masiguro na an mga recipiente maboto saimo, ciertohon na an pigahagad bakong para sa pa-debut kan aqui, pa-bertdey kan agom o panghanda sa sociedad.
*****
Bakong gimik sa politica an submarine power cable project ni Cong Hector Sanchez.
Iyo ini an galuwas na katotoohan base sa pahayag kan consultant kan Transco, an maimplementar kan grid interconnection project na matakod kan linya nin corriente sa isla duman sa linya kan main grid ning Luzon.
Segun qui Prof. Wally del Mundo, maabot nin cuatro bilyones pesos an magiging gastos sa proyecto na malatag nin duwang linya nin cable sa irarom kan dagat haring Codon sa Calolbon papuntang Caramoan sa CamSur.
Naabala lang daa kan pandemya an proceso alagad sigurado nang an Catanduanes an maenot na maikonektar sa main grid, kasunod an Palawan y Mindoro.
Sa maabot na Hunyo, mahaman na daa an master plan para sa tolong proyectong ini.
Kung mahaman an grid interconnection sa Isla Maogma, mababa sa cuatro hanggan cuatro cincuenta pesos an generation rate sa Catanduanes, kumpara sa presenteng catorce pesos na actual na gastos sa pagproducir nin corriente.
Caya palan sige na an barik-barik kan satong congresista sa isla, ta habong madaog sa maabot na eleksyon, he! he! he!
Ta kung iyo, ibang tawo an makua kan credito sa daculang proyectong ini na segun sa Transco madara nin bilyones man na beneficio sa tawo asin negocio sa Isla Maogma.
*****
Tama man an posisyon kan cadaclan na magurang na dae dapat palaogon sa klase an mga estudyanteng bako pang bakunado, lalo na ngonian na dae pa man galayas an coronavirus y buhay pa an Omicron variant.
Ini proteksyon man sa saendang mga aqui minsan bakunado na pati man sa saendang mga maestro y maestra. Sisay baga an gusto maolakitan?