Kan nacaaguing mga semana, matapos na magputok sa FB an litrato ni Gob Cua na nakaitaas an kamot kasabay an duwang gobernadora kan Bicol y an aqui kan diktador, maguiromdoman na nagnegar an gobernadora na sinuportaran niya si BBM.
Sinabi niya pa ngani na katunayan nagpaguibo na siya ng seis cientos mil pesos na halaga nin tarpaulin poster ni VP Leni.
Masakit daang kontrahon an mga votante ni Leni sa Isla Maogma, lalo na ta an laom kan campo sa capitolyo maabot sa sitenta porciento kan votante an mavoto sa bise presidente.
Ngonian, iguang bareta duman sa Norte na naheling daa an trak nin Bagong Timpla na gakabit kan saendang poster, kasabay an poster ni BBM.
Dae man daa puedeng dudahan an nakaheling ta lider daa ini nin Bagong Timpla y parasunod man ni VP Leni.
Kung ano an kawat kan satong mga amo sa itaas, magayon na amay pa maisihan na kan banwaan sa Isla Maogma.
*****
An nahangop palan daa kan ayam ning pulis duman sa nakaparadang awto sa may trangkahan ning campo iyo daa an nitroglycerine sa kahangan ning brake fluid.
Duwa pa ngani daang gadya an kinua y pareho man ining nagtukaw sa may rikudan kan vehiculo.
An hapot, ano talaga an nangyaring insidente kan Febrero 23, suspetsadong bomba o praktis sana kan bomb squad?
Ta kung totoo na ang nahangop kan mga gadya an ingredient sa brake fluid, cotana sa kadakulan kan awto sa laog kan Campo Camacho, sige ining tukaw sa gilid kan mga nakaparadang carruaje.
Kung sala man an suspetsang ini, magayon na paapodon an mga taga-PHO tanganing duriduton an dungo kan mga ayam, tibaad naolakitan na ini nin COVID y nawaran nin panghangop….
*****
Inaabisuhan an mga candidato, lalo na an mga daeng perac, na sa Viernes, fecha cuatro nin Marso, matarangkas na nin illegal poster an Comelec y pag-iribang agencia sa Oplan Baklas.
Haharion an mga nasa poste nin corriente, kahoy na nasa luwas nin kudal, asin nakadukot o nakapaskil sa mga edificio o imprastrakturang gamit nin publico (kabale an nahubon ni Nestor).
Dae daa babaklason an mga poster sa kudal kan pribadong tawo asin an mga nakadukot sa saendang propriedad o sa solar, alagad tatawan daa nin magkakanigong noticia sa mga darakulang poster,
Caya matada man siempre an mga dinukot sa kudal, kinahang man ini nin iguang permiso an kagsadiri o dae.
An mga hababaw an bolsa, dapat harion ngona an saendang poster sa bawal na lugar sa highway, ibalik na sana pag-abot kan karampanyahan. Sayang man an gastos kung mapagibo pa ning bago.
Ngonian, dapat nang makialam an mga kagsadiri nin kudal o harong o tindahan sa pagkabit nin mga poster nin kandidato.
Kung dae man nagpaisi an candidato, tangkason na ninda an mga poster.
Magayon na ipaarkila na sana an espasyong dudukotan o papaskilan tanganing mapakinabangan.
Isipon nindo na an mga traysikel ngani gasingil nin quinientos an bulan sa mga gapakahang nin poster sa rikod kan traysikel.
Kung harimbawang iyo man ini an singilon kan kagsadiri nin kudal, makaamot ta an lakbang man sana kan cada poster dos piye.
Kung an kudal mo veinte piye an laba y seis piye an langkaw, puede ka makapakahang nin veinte pidasong poster na magkakahalaga nin diez mil sa sarong bulan sana, he! he! he!
No pay, no poster an palisiya, ta tibaad maubusan nin cuarta an candidato harayo pa an eleksyon. Guiromdomon na nagiging mariringawon na an mga candidato pakatapos kan eleksyon, gana o daog, he! he! he!
*****
Igua palan nin nagtoke kan pantiyon nin bag-ong lubong na gadan sa Calolbon.
Kung pobre an defunto, ano daw ang tuyo? Mapadoon sa documento? Iguang personal na kauyaman? Gusto sanang mahiling ta napung-aw?