Bago matapos an taon, iguang suhestiyon na kung igua pang COVID-19 pag-abot kan misa-misa sa 2022, dapat nang pag-isipan kan Diocesis an marinas na pagpatocaw sa laog kan katedral.
Segun sa goslab na reclamador, isi nindang limitado sana an kapasidad kan simbahan na mayor por sobre sa pandemya caya ngani nagpunta sinda alas dos y medya nin aga.
Alagad, pag-abot sa simbahan aduman na sinda sa murhinan.
Caya kinaagahan, nagmata sinda ala una y medya pero pag-laog sa simbahan igua nang tawo, halos dae nang matocawan minsan dai pa banga an laog.
An nakauyam daa ta an mga tocawan kinaranghan na nin bag, payong, panyo, jacket y iba pang bagay tanganing ireserba an tocawan sa mga dae pa gaabot na kaibahan.
Sala man ngaya ini. Kung gusto ngaya nindang macatocaw, dapat mag-amay man pasimbahan.
May punto an senior citizen.
Sa masunod, marinas na pag-isipan kan senyor Obispo an pagpa-raffle kan mga tocawan sa simbahan. An cada tocawan markahan nin numero y magpabakal nin tiket sa mga gustong magsimba nin siyam ba beses.
Makita na nin idagdag sa pagpahaman kan katedral, dae pang gumod-gumod.
Kung habo nin raffle, ipagbawal an pagreserba nin tocawan, bawal an pagkahang nin anoman na gamit sa ibabaw.
Kung maamay man nin tolong oras bago pa an misa, pagpabayadon nin renta sa tocawan ta makaraturog man sana an mga ini, he! he! he!
*****
Nareparo man na kahoy na palan an sinakayan na kabayo kan Santa Maria sa Kagharong y nakalunad pa sa trak.
Dae na sigurong kabayo sa isla y kung igua man, mga maniwang na.
Dae man puedeng karbaw ta tibaad manungay nin tawo.
Inaapodan an local na gobyerno o kung sisay man an mahilig sa hayop, na magdara nin sampulong kabayo, minsan mga retirado sa karera, tanganing marinas man lamang paghilingon an Kagharong sa 2022.
*****
Nabangga palan daa an pickup kan Gigmoto MDRRMO duman sa municipio kan Viga kan Viernes.
An problema daa, bako man official driver an gakapot kan manibela kan mangyari an aksidente y dae man nin emergenciang piga respondehan.
Segun sa chismosong taga-Viga, an pasahero daa kan pickup nin MDRRMO iyo mismo si alcalde At-At Tayam.
Totoo man daang saraksakan an dudumanan kan awto alagad an invuelto mga maldos sa bulangan, he! he! he!
Pirmi palan na pigagamit ini kan alcalde sa pag-atender nin burulang caya ngani daa sagcod sa ngonian, dae pa ini pigakanghan nin plaka kan LTO o caya tatak na “For Official Use Only.”
Ano man daw an masasabi kan mga votante nin Gigmoto sa pag-abusong ini?
*****
Cadaclan kan mga daraculang politico nagdurulag sa Maynilang kayganda bago pa mag-Deciembre veinte-cuatro.
Wara si dating alcalde Leo, an dating congresista, si manoy Hec y an representante kan TGP.
An nahubon sana yata iyo sinda gob Boboy, manay Shy, si atorni Puting Buhok y an parabonong balbas-sarado.
Alagad, para sa ginatos na nakihagad nin pamasko kan fecha veinte cinco, duman sana an pila sa Capilihan.
*****
Igua daang politico na rinusob nin agom dahil sa nadakop na kaiba an alagang salampati.
Segun sa chismoso, pinaralayas pati daa an mga empleyado kan establisimiento.
Kung sisay ini, dae ko isi. Diyan daa tabi maghapot sa simbahan nin Bato ta adyan an mga chismoso, he! he! he!
*****
Sa mga masakay sa eroplano pa-Virac haring Manila, inaabisuhan kamo na magpa-NAIA 3 ala una nin aga, minsan alas cinco y medya pa an boarding.
Cabangang kilometro an pilang aabutan mo kung alas cuatro ka mapunta.
Duwang oras bago ka makaabot sa check-in counter, aabarahon ka pa kung sobra sa saro an handcarried baggage mo.
Magbalon nin pagcaon sa pila y pag-abot sa departure area, dagos magbakal nin tubig.
Dae na palan gatinda nin anuman sa laog kan eroplano habang ga-viaje. Kung caonon mo an balon mo, dapat bitbit pagluwas an patos.