Seryoso an cadaclan na candidato

Habang igua pang duwang aldaw na natatada, magbisita na kamo sa pantiyon kan saendong mga natigbak na mahal sa buhay.
Sa mga pribadong camposanto, alas otso ning aga hanggan alas singko sana an visiting hours. Ini tangani sigurong dae mangyari an irinoman harimbawang magpabanggui an mga mabisita.
An problema sana, sarado an trangkahan nin sementeryo sa ibang mga ciudadano, lalo na itong mga gatrabaho alas otso hanggan alas singko.
Cotana dagdagan pa nin duwang oras an pagbukas kan mga sementeryo, magpoon alas siete nin aga hasta alas sais nin hapon tanganing malugaran pa man an mga trabahador na nakagakod sa saendang mga lamesa sa gobyerno o pribadong companya.


An gabos man sigurong mga candidato ngonian, lalo na itong mga nasa itaas, puro man seryoso sa saendang magiging campanya.
Afuera na sana siguro sa atorning puti an buhok, na soboot sinabihan an mga lider sa barangay na dae siya iboto sa pagca-congressman asin itao an voto sa kalaban na contratista.
Segun sa mga taga-Bato, an sisay man daang mga lider na makatao nin bugok na voto sa candidatong ini sa presinto ninda, tatawan nin veinte mil pesos.
Sa Bato sana tabi ini, bahala na man an mga karibal ni atorni puting buhok na magtao nin veinte mil sa sisay man na lider sa presintong makapa-zero sa saiya sa eleksyon, he! he! he!
Si dating alcalde Leo Rodriguez, mabarik na daa sa Isla Maogma ngonian na katapusan para magpoon na pagribot-ribot sa luwas nin Bato.
Seryoso daa ini magiging campanya, caya ngani gahanap na nin saiyang mga magiging lider sa cada banwa y barangay.
An saro man na dae nacaringaw sa mejoras nin Congreso, cierto na man daa ta hanap daa nin tawo an saiyang presencia. An habo sana an mga contratista, lalo na itong mga pigasingil pa nin soboot utang sa mga proyecto kan 2016, he! he! he!
Si Cong Hec, sige man sana an trabaho, minsan an cadaclan daang lider ni Gob Boboy habo sa saiya ta nawara nin halos sarong taon sa sobrang katakutan na mahawa nin birus.
An magiging kalaban ni gobernador na si Bise Gob Shirley, seryoso man ini sa magiging campanya lalo na ta madrama an pagsumitir kan COC sa Comelec.
Harimbawang iguang magcapital sa pagdalagan kan Bise, magiging close-fight an laban sa capitolyo, padaculan nin bubod, paororagan nin lider y stratehiya.
An dapat sanang guilomdomon kan mga candidatong ini, lalo na sa mga posisyon nin gobernador, bise gobernador, bocal, congressman, alcalde y bise alcalde, masakit nang magbarawbasaw sa mga masunod na bulan, o caya bigla na sanang magwithdraw o magpasalida sa Noviembre 15.
Saro sana an iisipon nin tawo kaan, na an gustong sabihon kan pagmarangmarang nin campanya, pag-atras nin candidature o pagpasalida sa kung sisay man na pulano, ika nagpabakal.


Cincuenta palan na body-worn cameras an itinao kan municipio sa cuerpo de policia kan Virac.
Marinas ini, lalo na ta dati na sindang nanobri sa PDEA kung igua sindang mga operasyon contra droga.
Saro pa, mabawasan an pagduda nin tawo na padagos an soboot pagkalang nin shabu sa mga target nindang mga paragamit o parapabakal nin bato.
An mga designated searcher o parahanap nin contraband dapat may gamit na body camera, siring man an saro sa mga witness tanganing siguradong daeng milagro sa operasyon y ciertong makukulang an sisay man na makuahan nin ilegal na droga.
Alagad sobra man ini kung gagamiton sana sa mga buy-bust y pagsirve nin search warrant.
Cotana darhon man ini kan kapulisan sa pagbogtak nin checkpoint, sa pag-imbestigar nin mga krimen o aksidente, pati na sa pagdakop nin mga pasusuhayon na mga drayber.
Sa maabot na panahon siguro, an mga lalaki pasuloton man nin body camera kan saendang mga agom sa pagluwas nin harong, naka-live pa, tanganing dae makaisip na maggibo nin milagro o mamasyar sa Calle Mabole, he! he! he!
Ipakahang an permanenteng bodycam sa angog tanganing hiling an gabos, he! he! he!

Leave a Reply

This site uses Akismet to reduce spam. Learn how your comment data is processed.

%d bloggers like this: