Pakatapos nin magcapirang bulan, nagtugpo man an satong congresista sa Isla Maogma.
Medyo maawat-awat daa ini nin ribot-ribot sa saiyang mga constituentes, na an cadaclan nakaringaw na sa saiyang pandok ta an pirming nakaabot iyo si Bong Teves kan TGP.
Tibaad lamang nagbitbit ini nin daculang bag na pano nin panaltag, ta an mga naghagad nin tabang kan panahon na wara siya, tibaad magbalik y madagdagan pa an pila diyan sa mansiyon sa Valencia.
Kung pinasinsilyo na nin tig-quinientos o dos cientos, mayad. Pero kung birilog pang manang, mas marinas tanganing biyo-biyo na an tabang, he! he! he!
Pakaabot daa caini sa isla, dagos na binisita ni Cong Hec an DepEd Catanduanes division office para kahoronon an mga opisyal caini manongod sa siete cientos milyones pesos na fondo para sa pagpahingayad kan mga school buildings sa isla.
Sinabi man daa kan congresista, na an pangaran nadangog sana sa mga nacaaguing bulan kung brownout, mapoon na daa an trabaho kan National Transmission Corporation (Transco) sa 69-KV submarine cable ngonian na Agosto 2021.
Dae pa cierto kung saen-saen pa mabisita an congressman sa mga maabot na aldaw para magpaguilomdom sa mga tawo na siya buhay pa, daeng COVID, y puede pang magkandidato sa 2022.
An mga tawong iguang mga singilon na utang qui Cong Hec, inaabisuhan na igua na sana sindang sarong semana para madakop an saendang representante sa Congreso.
*****
Ang anuman na ilegal na sugal dai madanay kung iinitan nin satong autoridad, lalo na an pulis.
Entonces, kung iguang tupada, jueteng, ending, lotteng, o online sabong na padagos an operasyon minsan isi na nin publico (dae na cabali si Nestor), senyal iyan na an autoridad, lalo na an capitan del baryo, alcalde o gobernador, pati na an mga pulis, nacarecibe nin regular na majoras sa mga operador caini.
Puedeng ini sa paagui nin semanal na lagay, magisip na imo o mahamot na bagas, o caya panuga na sa masunod na eleksyon matabang sa pagkaroy nin mga votante.
Baguing iyo ini an nangyayari sa ngonian diyan sa Virac, ta dae napatonong an tarayaan sa online sabong diyan sa solar nin duwang dating alcalde.
Pigreclamo na ini sa pulis, alagad an sinugo daang mga imbestigador daeng nakuang evidencia. Nakandaduhan siguro an trangkahan kan online sabong caya daeng naheling na mga ilegalista.
Sa otro, magayon na an hagadan nin tabang kan mga reclamador iyo an NBI o caya CIDG. Magpabayad man an mga ini, dacula an mababawas sa capital kan mga responsable.
*****
Puede na palan maglamyerda an mga bakunado.
Inaprobaran ini kan IATF kan nacaaguing semana, caya an mga nabakunahan na nin completo, cabali an mga goslab, puede na magribot sa enterong Pilipinas.
Sa heling ko, duwang rason kung ngata ini tinutogan na kan gobyerno nasyonal.
Enot, tanganing magdakul an gusto magpabakuna, ta masque ngani sa mga health frontliners igua pang habo magpasaksak nin vaccine, lalo na kung Sinovac.
Icaduwa, sa paagui caini, madagdagan an maviaje, mabuhayan an mga airlines pati an mga bus company y ferry operators.
An importante sana daa, an gabos na mabalagbalag dapat magsunod sa mga reglamento kan DOH sa pagsul-ot nin face mask, paghugas nin kamot y pagdistancia sa mga dae kamidbid.
Adyan an posibilidad na, siring kan mga APOR na dae ta isi kung saen hare, ikalat man kan mga viajerong ini an birus.
*****
Sa mga maabot na aldaw, iguang maribot na papel sa mga barangay para pirmahan kan mga votante.
Ini daa para sa pagpadagos ning pagbabag-o sa administrasyon ni Pay Digong Duterte.
Posibleng ini gigibohon na prueba tanganing maniwara an cadaclan sa Pilipinas na gusto kan mga taga-provincia na magcandidato an sisay man qui Pay Digong, bilang bise presidente, o sa aking si Mayor Sara, bilang presidente.
Dae na magparasagin-sagin an mga Duterte, ta an hanap caini magtener sa puesto tanganing dae makasuhan y maprotegeran an mga alipores, lalo na an mga ilegalista, he! he! he!