Baging pinarid na kan duwang bagyong uminagi an isyu sa food poisoning na ikinaospital nin sobrang sanggatos katawong nakidapit sa defuntong ama ni Gob Boboy Cua.
Maguiromdoman na nangyari an insidente pirang oras matapos an lubong kan hapon nin Oktubre 24. Alagad, naghapit si Quinta kinaagahan, kaya naabala an imbestigasyon.
An suspetsa uyag na an palaman kan egg sandwich na gibo ni Imay alagad an caterer soboot binasol an slice bread.
Sa pacaisi kan cadaclan, itinao sa Virac RHU an mga natadang sandwich tanganing maeksamin. Caya ngani kan fecha 30 kan Oktubre, rinekomendar ni Dr. Joson qui alcalde Posoy na isuspendi an operasyon kan caterer na Wedding East y an panaderiang Jed’s Bakeshop “until further notice.”
An gustong sabihon, dae nagtao nin quince dias sana o sarong bulan, kundi indefinite hanggan daeng resulta an imbestigasyon.
An problema, ma-sarong bulan na, dae pang pinaluwas na findings an RHU caya an duwang establisimiento pendiente an mga transaksyon.
Dae man siguro pinarid kan hangin ni Rolly y Ulysses an kapapelan asin evidencia sa insidente.
Kung ako sa duwang ini, padarhan na nin surat kan saendang mga abogado kung ano talaga an dahelan kung ngata nag-orobra an mga nakakaon kan tinapay na iguang palaman.
Sala man na papaghalaton sinda hanggang noarin maguiromdoman ni Dr. Joson y pag-iriba an saendang obligacion na taposon an imbestigasyon sa lalong madaring panahon.
Kung ako sa Wedding East, padarhan oro-aldaw nin egg sandwich an Virac RHU asin an oficina ni alcalde, he! he! he!
*****
Igua daang mga reclamador sa facebook an nagpaabot nin saendang muromuto sa halangkaw na presyo nin barakalon apesar na nasa estado nin calamidad an isla.
An sarong patos nin yelo na dating tres pesos, naging diez hanggan quince pa. An mga dating maluyang claseng sira na turay asin dorado, an presyo halangkaw na. Ultimong sebolyas halos tres cientos na an kilo.
An masakit ta an pigabasol daa an capitolyo, mantang sa presyo nin mga basic goods arog kan bagas, delata asin iba pa, an DTI y an Local Price and Consumers Coordinating Council na pinangengenotan kan alcalde an responsable.
Sa presyo man nin carne y sila, iguang sadiring ordinansa an municipio na iyo an gaimponer kan tamang presyo. Ngata daw ta dae pigapaturuwad kan municipio an mga lamesa kan overpriced na sila arog kan ginibo kan defuntong alcalde Ribong?
*****
Segun man sa sarong chismoso, dapat man daang reparohon kan mga tawo sa banwang kataning nin daculang salog kung haen na an mga equipaje na sadiri kan municipio.
Ta an suspetsa, gamit pa daa ini nin sarong contratista sa mga proyecto, imbes na ini magamit sa paghakot kan basurang hubon kan bagyo.
Ini minsan an masakit sa mga municipiong gabakal nin mga equipaje arog kan bulldozer, loader, dumptruck asin iba pa.
An enot na minagamit iyo an alcalde o caya an saiyang mga favoritong contratista. Mabayad sana nin diit na arkila, gagamiton nin halawig na panahon, minsang Sabado asin Simba gabuag an mga makina.
Daeng halaga an rental ordinance, ta dae man nabantayan an gagamit. Natural lugi an banwaan na iyo an gabayad kan inutangan na equipaje.
*****
Sorobra na palan an relief goods na narecibe kan ibang banwaan arog kan Bato asin Baras, mantang an Virac y San Andres kulang pa an nakaabot sa mga barangay.
Cadacul kan gustong sabihon caini.
Posibleng alisto si alcalde Juan y alcalde Paolo sa panghagad nin tabang sa manlaenlaen na grupo, apesar na igua sindang kafamilia na mahigos sa haranapan nin ayuda.
Posible man na sa sobrang kadinaculaan kan Virac y San Andres, talagang masakit matawan an gabos sa lalong madaring panahon.
Adyan man an posibilidad na nagkadoroble na an panaltag ta an mga ginagalangan na mga Santa Claus duman sana gusto manaltag sa Bato y Baras. Dae man sigurong puedeng bawalan an mga ini y sabihan na duman na sinda sa kahadean ni Bos Te y Posoy manao nin relief.