Tinubuan na palan nin awot an paribot kan Home for the Elderly na tinogdok nin DPWH diyan sa Calatagan Tibang sa Virac.
Awat na ining nahaman, kan sarong taon pa, y dati nang nagtuga si dating OIC President Barba kan CatSU na dae sindang alokasyon na fondo para sa operasyon kan facilidad na ini.
Maguiromdoman na pinaapod kan consejo municipal an mga opisyal nin DPWH y CatSU, pati na an MSWDO y an OSCA, hapoton kung ngata duman binogtak an edificio, apat na kilometro hari sa banwa y sa karikod-rikodi nin unibersidad na daing ibang kataning na oficina.
Segun sa mga testimonya, an lokasyon daa caini kapagbootan ni Cong Yoloyo y dating Presidente Azanza kan 2024 pa y dae ngani daa ining Memorandum of Agreement sa DPWH.
Dae man nacaisi an municipio o MSWDO pati na an OSCA pano ini nakapunta diyan sa bukid nin Tibang.
An naguiromdoman daang hinagad kan mga goslab sa Virac diyan ibogtak sa San Roque harani sa Pilot, alagad mahaman na an edificio sa Tibang kan maisihan ninda ini.
Ta dae man nin fondo o personaje an CatSU para padalaganon an Home for the Elderly, sagcod sa ngonian dae ini nagamit, entonces sarong ghost project, naheling pero daeng halaga.
Dae man ini puedeng itao sa municipio ta an dagang natogdokan sadiri nin CatSU.
Puede ipagamit alagad sisay na mga gurang an mangahang sa kaharayong lugar na ini?
An posibilidad na sanang puedeng gibohon para dae masayang an cuarta nin publico (cabale an mga erencia ni Nestor) iyo na labnoton an enterong edificio y ibaryo sa uma diyan sa San Roque.
Mag-arkila nin higanteng crane qui Ang Hung o caya sa China, papondohan qui Cong Yoloyo nin sanggatos milyones.
Ta kung dae, puedeng destinohan ni Gob-Cong Azanza nin sarong bus para maghatod-sundo sa mga wrangler na mapunta sa Home for the Elderly…
*****
Isabay ta siguro sa paghorop-horop kan pagtios ni Kristo Hesus ngonian na Semana Santa an paghagad nin kapatawadan sa Kagurangnan para sa mga politicong padagos na nanghahabas sa caban nin gobyerno magpoon pa caidto.
Puro ini mga inosente, segun sa saenda, y dae sindang pakanabot sa mga anomalya sa flood control projects kan panahon ni Digong hanggan sa pagtocaw ni Bongbong.
Caya magcacanigo na an saendang mga calag, magpoon sa mga mastermind hanggan sa mga congresista y district engineer, ipagdasal ta sa kalangitan na dae lamang sinda isabod sa gakalakagang karigosan ni Satanas.
Alagad, ta malang baguing masakit magkumpisal an mga tahodan na ini, isipon an tamang padusa sa saenda bago kamo magkaturog.
Tibaad lamang pangaturogan kamo na an mg aini dinakop, pigabadol nin bakal habang nakagapos nin tie wire y iguang coronang barbed wire, asin maalsa nin cruz na gibo sa steel sheet piles, idara sa baybayon o sa gilid nin salog para duman ibogtak.
Saka maghagad nin dispensa sa Kaitaasan sa maraot na intensyon…
*****
Sisay daw na politicong mahabas y saiyang esposo o esposa an maprusisyon sa Viernes Santo?
Reparoha niyo man an saiyang gubing kung inano kamahal.
Helingon an relo kung baratohon na Seiko o minilyon na Rolex.
Maanan an sapatos kung inorderan sa Marikina o Tsina o caya Gucci, Prada, Louis Vuitton o Hermes.
Saringoyan kung gapamibi o garosaryo lamang, gamunimuni kan saendang naginibohan bilang servidor nin banwaan.
Harimbawang ika maescandalo kan naheling mo, mangurus nin tolong vez y magdasal nin tiglimang Ama Niamo, Ave Maria asin Kamurawayan sa Santisima Trinidad…